काठमाडौँ। फ्रान्समा पशु चौपायामा देखिँदै आएको शामोन्डा भाइरस पहिलोपटक मानिसमा पुष्टि भएको छ।
फ्रान्समा यो भाइरसबाट सङ्क्रमित एक बिरामीको मृत्यु भएपछि स्वास्थ्य अधिकारीहरूले घटनाबारे अनुसन्धान अघि बढाएका छन्। यद्यपि, अधिकारीहरूले तत्काल आमसर्वसाधारणमा जोखिम देखिएको बताएका छैनन्।
फ्रान्सका स्वास्थ्य अधिकारीहरूले बिहीबार एक व्यक्तिमा शामोन्डा भाइरसको सङ्क्रमण पुष्टि भएको जानकारी दिएका हुन्। पूर्वी फ्रान्सका ती बिरामी सङ्क्रमित भएपछि उपचारका लागि अस्पताल पुगेका थिए। तर, पछि उनको मृत्यु भएको जनाइएको छ।
यसअघि फ्रान्स सरकारले शामोन्डा भाइरस मानिसमा सर्ने गरेको प्रमाण नरहेको मान्दै आएको थियो। कीराको टोकाइबाट सर्ने यो भाइरस मुख्यतः गाईवस्तुलगायतका पशुमा देखिने गरेको छ। मानिसमा सङ्क्रमण पुष्टि भएपछि यसको सम्भावित जोखिम र सङ्क्रमणको प्रकृतिबारे चासो बढेको छ।
पशुबाट मानिसमा सङ्क्रमणको चिन्ता
पूर्वी फ्रान्समा सन् २०२६ को वसन्त र ग्रीष्म ऋतुमा पशुचौपायामा शामोन्डा भाइरस फैलिएको थियो। पछिल्लो घटनाले पशुमा सीमित ठानिएको भाइरस मानिसमा पनि देखिन सक्ने सम्भावनाबारे थप अध्ययन गर्नुपर्ने देखाएको छ।
सन् १९६० को दशकको मध्यतिर नाइजेरियामा पहिलोपटक पहिचान भएको शामोन्डा भाइरस अफ्रिका र जापानमा विभिन्न समयमा पशुमा देखिँदै आएको छ। सन् २०२६ मा भने यो भाइरस युरोपका विभिन्न देशमा पनि फैलिएको विवरण सार्वजनिक भएका छन्।
बेलायतको एनिमल एन्ड प्लान्ट हेल्थ एजेन्सीका अनुसार यो भाइरसले वयस्क गाईवस्तुमा अचानक ज्वरो आउने, पातलो दिसा हुने र पेट दुख्नेजस्ता लक्षण देखाउन सक्छ। सङ्क्रमित गाईमा गर्भपतन भएका घटना पनि दर्ता भएका छन्। गर्भावस्थामा सङ्क्रमण भएमा जन्मिने बच्चामा जन्मजात विकृति देखिन सक्ने चिन्ता व्यक्त गरिएको छ।
गाईवस्तुमा मात्रै सीमित नरहेको यो भाइरस भेडा, बाख्रा, घोडा र अल्पाकामा समेत भेटिएको जनाइएको छ। पशु स्वास्थ्यसम्बन्धी प्रयोगशालाका विवरणअनुसार सन् २०२६ को अगस्टमा जर्मनीमा पनि यो भाइरस पहिचान भएको थियो। त्यसपछि फ्रान्स, स्विट्जरल्यान्ड र अस्ट्रियामा समेत यसको उपस्थिति पुष्टि भएको विवरण सार्वजनिक भएका छन्।
खोप उपलब्ध छैन
शामोन्डा भाइरस सिम्बु सेरोग्रुपअन्तर्गत पर्ने आरएनए भाइरस हो। आनुवंशिक रूपमा यो स्म्यालेनबर्ग भाइरससँग मिल्दोजुल्दो छ। यसअघि गाईवस्तुमा यसको सङ्क्रमण घातक नहुने ठानिएको थियो। तर, पशुमा देखिएका प्रजननसम्बन्धी समस्याले यसको प्रभावबारे थप अध्ययन आवश्यक बनाएको छ।
हालसम्म शामोन्डा भाइरसविरुद्धको खोप उपलब्ध छैन। मानिसमा पहिलोपटक सङ्क्रमण पुष्टि भएको घटनाले यसको सङ्क्रमणको स्रोत, मानिसमा पर्ने असर र सम्भावित जोखिमबारे थप अनुसन्धानको आवश्यकता औँल्याएको छ।
स्वास्थ्य अधिकारीहरूले तत्काल सर्वसाधारणमा जोखिम नरहेको बताएका भए पनि मानिसमा देखिएको पहिलो घटनाको प्रकृति र सङ्क्रमणसम्बन्धी थप विवरण महत्त्वपूर्ण हुने देखिन्छ।
