काठमाडौं। काठमाडौं महानगरपालिकाले थापाथलीमा रहेको परोपकार प्रसुति तथा स्त्री रोग अस्पताल (प्रसुतीगृह) र नर्भिक अस्पतालको क्यान्टिनमा खाद्य स्वच्छ्ता परिक्षण गरेको छ।
कामपाको उपप्रमुख एवम् अनुगमन संयोजक सुनिता डङ्गोलले बिहीबार घुम्ती खाद्य प्रयोगशालाबाट थापाथलीस्थित प्रसुतिगृह र नर्भिक अस्पतालका क्यान्टिनमा खाद्य वस्तुका नमूना सङ्कलन तथा परीक्षण कार्यको शुभारम्भ गरेकी हुन्।
खाद्य प्रविधि तथा गुण नियन्त्रण विभागसँगको सहकार्यमा खाद्य सेवासँग सम्बन्धित बजार अनुगमनमा घुम्ती खाद्य प्रयोगशालाको संचालन थालेको काठमाडौ महानगरले ठाउँकोठाउँ परिक्षण तथा गुणस्तर निरीक्षण गर्ने गरि अनुगमन थालिएको जनाएको छ।
त्यस क्रममा संयुक्त अनगुमन टोलीले खाद्य व्यवसाय सञ्चालन हुने स्थानहरूको खाद्य स्वच्छता तथा गुणस्तर निरीक्षण, खाद्य नमूनाहरूको स्थलगत परीक्षण विश्लेषण गरेको महानगरले जनाएको छ।
घुम्ती प्रयोगशालाबाट हुने कामका विषयमा जानकारी लिँदै उपप्रमुख डङ्गोलले, खाद्य स्वच्छताबाट उपभोक्ता अधिकार सुरक्षित गराउन घुम्ती प्रयोगशालाबाट तथ्यमा आधारित विवरण प्राप्त हुने बताईन्।
स्वच्छ खाद्य व्यवसायका लागि वैज्ञानिक कार्यक्रम तर्जुमा गर्न घुम्ती प्रयोगशालाबाट महत्त्वपूर्ण आधार निर्माण हुने उनको भनाइ छ।
खाद्य प्रविधि तथा गुण नियन्त्रण विभागका उपमहानिर्देशक सोमकान्त रिजालले कामपाको सहकार्यबाट गुणात्मक नतिजा प्राप्त हुने बताए।
घुम्ती प्रयोगशालाबाट परोपकार प्रसुति तथा स्त्री रोग अस्पतालको चमेना गृह (सुनिल क्यान्टिन), स्टाफ क्यान्टिन (मनकामना माई क्यान्टिन), अस्पतालको निःशुल्क खाजा, सुप तथा अन्य विरामीको लागि तयार गर्ने भान्छा र नर्भिक अस्पतालको क्याफे केयर प्रालिको अनुगमन निरीक्षण गरिएको महानगरपालिकाले जनाएको छ।
अनुगमनका क्रममा सुनिल क्यान्टिन र मनकामना क्यान्टिनबाट दूध, पानी र खाने तेलको स्थलगत नमूना सङ्कलन र परीक्षण गर्दा ती खाद्यवस्तुको गुणस्तर मापदण्डअनुसारको पाइएको बताइएको छ।
महानगरपालिकाका फुड टेक्नोलोजिष्ट भारती अधिकारीका अनुसार स्त्री रोग अस्पतालको क्यानटिनमा मासु तथा मासुजन्य पदार्थ र तरकारी साग सब्जीसँगै राखिएको पाइएको थियो।
यस्तै सो अस्पतालको क्यानटिनमा ग्याँस चुलो, रेफ्रिजरेटर फोहर अवस्थामा भेटिएको र व्यक्तिगत सरसफाइमा कमजोर देखिएको उनले जानकारी दिए। उनका अनुसार लेबल नभएको खाद्य सामाग्रीको प्रयोग भेटिएको र सिन्थेटिक रङ्गको अनुचित प्रयोग भेटिएको थियो। महनगरले सो विषयमा क्यान्टिन संचालकलाई सचेत गराएको छ।
प्रसुतीगृहको क्यान्टिनबाट लिइएको मःम सँग खाने अचारको नमूना लिएर खाद्य प्रविधि तथा गुण नियन्त्रण विभागको राष्ट्रिय खाद्य तथा दाना रिफरेन्स प्रयोगशालामा परीक्षणका लागि पठाएको छ।
यसैगरी नर्भिक अस्पतालको क्याफे केयरबाट नमूना लिइएको क्रिम डुनटको नमूना पनि रिफरेन्स प्रयोगशालामा पठाइएको छ।
