हेटौंडा। हेटौँडा उपमहानगरपालिका–१५ स्थित रातोमाटे चेकपोइन्ट नजिक ईभी माइक्रो दुर्घटना हुँदा छ जना यात्रु घाइते भएका छन्।
महेन्द्र राजमार्गअन्तर्गत पर्ने सो सडक खण्डमा वीरगन्जबाट काठमाडौँतर्फ जाँदै गरेको बा प्र ०६–००१ ज ०४६९ नम्बरको ईभी माइक्रो आज दिउँसो जङ्गली जनावरले बाटो काट्दा चिप्लिएर दुर्घटनामा परेको प्रहरीले जनाएको हो।
जिल्ला प्रहरी कार्यालय मकवानपुरका प्रहरी नायब उपरीक्षक माधवप्रसाद काफ्लेले सो माइक्रोमा चालकसहित आठ जना सवार रहेको पाइएको जानकारी दिए। उनका अनुसार दुर्घटनामा घाइते भएकाहरूलाई उपचारका लागि हेटौँडा अस्पताल पुर्याइएको छ।
यस्तै माइक्रोका चालक काठमाडौँको बुढानीलकण्ठ नगरपालिका–१० का ५६ वर्षीय दिलीप सिलवाललाई प्रहरीले नियन्त्रणमा लिएको छ।
