बारा। राष्ट्रिय स्वतन्त्र पार्टी (रास्वपा) मधेस प्रदेशका संस्थापक सदस्य तथा बारा जिल्लाका नेता पवन चौधरीले पार्टीबाट राजीनामा दिएका छन्।
बारा जिल्लाका सह–सचिव एवं संगठन प्रमुख समेत रहेका चौधरीले शुक्रबारदेखि लागू हुनेगरी साधारण सदस्यसमेत नरहने गरी पार्टीबाट राजीनामा दिएका हुन्।
आसन्न फागुन २१ गतेको निर्वाचन प्रक्रियासम्बन्धी पार्टीले अवलम्बन गरेको पद्धति, निर्णय तथा कार्यशैली पार्टी विधान र सार्वजनिक प्रतिबद्धताभन्दा विपरीत रहेको भन्दै चौधरीले राजीनामा दिएको बताएका छन्।
संगठनमा सक्रिय रूपमा खटिएका सदस्यहरूको योगदानको उचित मूल्यांकन नभएको, विधि र विधान विपरीत गतिविधि भएको तथा पार्टीका सिद्धान्तहरू व्यवहारमा कार्यान्वयन नभएको आरोप चाैधरीले लगाएका छन्।
राजनीतिमा युवा पुस्ता आउनुपर्छ' र 'जान्नेलाई छान्ने' भन्ने पार्टीको मूल नाराबाट प्रेरित भई आफू पार्टीमा आबद्ध भएपनि पछिल्लो समय त्यस बिपरित काम हुन थालेपछि आफुले पार्टी छाड्ने अवस्थामा पुगेको चाैधरीले बताए।
पार्टीका निर्णयहरू आर्थिक अनियमितताबाट प्रभावित भएको दाबी गर्दै यस्तो परिस्थितिमा मौन बसिरहन नसक्ने चाैधरीकाे भनाइ छ।
