निजगढ। बारा क्षेत्र नम्बर १ मा नेकपा एमाले, नेपाली कम्युनिस्ट पार्टी, जसपा र रास्वपा परित्याग गर्दै दुई दर्जन बढी ब्यक्ति नेपाली कांग्रेस प्रवेश गरेका छन्।
बारा क्षेत्र नम्बर १ का तर्फबाट नेपाली कांग्रेसका उम्मेदवार रहेका शम्भु बुढाथोकी र सिम्रौनगढ नगरपालिकाका पुर्व प्रमुख तथा बारा क्षेत्र नम्बर १ का क्षेत्रीय सभापति विजयशंकर यादवले शुक्रबार विहान आदर्श कोतवाल गाउँपालिकामा आयोजित एक कार्यक्रममा उनीहरूलाई कांग्रेसमा स्वागत गरेका हुन्।
कांग्रेस नवप्रवेशी सन्तोष कुमार गुप्ताले कांग्रेस जनताको सुख दु:खमा साथ दिने पार्टी भएकाले आफुले कांग्रेस रोजेको बताए।
`कांग्रेसले मधेसका लागि दिएको योगदान हजुरबुबा र बाहरुले सुनाउनु भयो, अहिले गगन थापा सभापति भएपछि कांग्रेसमा थप उर्जा देखियो, जनताको सुख दु:खमा साथ दिने पार्टी भएकाले मेरो झुकाव कांग्रेस प्रती रह्यो र कांग्रेस रोजें।´ जेन-जी युवा गुप्ताले भने।
आदर्श कोतवाल गाउँपालिकामा नेपाली कम्युनिस्ट पार्टी परित्याग गरेका प्रेमलाल साहले पनि गरिब दु:खीहरुको साहरा कांग्रेस भएकाले आफु कांग्रेसमा आएको सुनाए।
सन्तोष र प्रेमलालसँगै सो गाउँपालिकाका रमेश साह, महादेव साह, श्रीचन साह, सिकेन्द्र साह, धर्मेन्द्र साह, मोहित साह, उदय साह, जोकु ठाकुर, मेघनाथ साह, मोहन साह लगायत दुई दर्जन ब्यक्ति कांग्रेस प्रवेश गरेका हुन्।
बारा १ मा नेपाली कांग्रेस प्रवेश गर्नेको संख्या दिनानुदिन बढ्दै जाँदा कांग्रेस उम्मेदवार रहेका बुढाथोकीको पक्षमा माहोल थप बलियो बन्दै गएको छ। उनी निजगढ निवासी स्थानीय हुन्।
