बिरगंज। बिरगंज महानगरपालिकामा हैजा संक्रमणको कारण खोज्न पानीको परिक्षण सुरु गरिएको छ।
पछिल्ला दिनमा तीव्र रूपमा देखा परेको झाडापखाला तथा हैजा संक्रमणको जोखिमलाई मध्यनजर गर्दै बिरगंज महानगरपालिकाले पानी परीक्षणको काम सुरु गरेको हो।
महानगरले संक्रमणको प्रमुख कारण दूषित खानेपानी हुनसक्ने आशंका गर्दै आएको छ। सोही अनुसार पानीको नमुना संकलन र प्रयोगशाला परीक्षण प्रक्रिया अघि बढाइएको हो।
बिरगंज महानगरका नगर प्रमुख राजेशमान सिंहले महानगरपालिकाको प्राविधिक टोलीले सोमबार वडा नम्बर १०, ११ र १२ भित्रका विभिन्न पाँच स्थानका धाराबाट पानीको नमुना संकलन गरेर परीक्षण थालेको बताए।
उनका अनुसार माइक्रोबायोलोजिष्ट अजय मण्डल, वातावरण निरीक्षक प्रकाश ऐरसहितको प्राविधिक टोलीले शंकास्पद क्षेत्रमा पुगेर धाराको पानी संकलन गरी प्रयोगशालामा परीक्षण गर्ने कार्यलाई तीव्रता दिएका छन्।
सिंहका अनुसार महानगरपालिकाले वडा नम्बर १ छपकैया स्थित खानेपानी प्रशोधन केन्द्रमै पानी परीक्षणका लागि अत्याधुनिक प्रयोगशाला स्थापना गरेको छ।
उक्त प्रयोगशालामा हाल इ. कोली परीक्षण सहजै हुने व्यवस्था मिलाइएको मेयर सिंहले बताए। युनिसेफले उपलब्ध गराएको विशेष किट प्रयोग गरेर कोलिफर्म परीक्षण समेत सुरु गरिएको छ।
माइक्रोबायोलोजिष्ट मण्डलका अनुसार इ कोली परीक्षणको प्रारम्भिक नतिजा २४ घण्टाभित्र आउँछ भने कोलिफर्म परीक्षणको विस्तृत रिपोर्ट पाउन करिब ७२ घण्टा लाग्नेछ।
