भक्तपुर। बागमती प्रदेशका स्वास्थ्य मन्त्री किरण थापाले बागमती प्रदेशका १३ वटै जिल्लामा योग समिति गठन गरिने बताएका छन्।
शुक्रबार भक्तपुरमा आयोजित एक कार्यक्रमलाई सम्बोधन गर्दै थापाले मानवीय शरीरलाई निरोगी, सशक्त र सकारात्मक बनाउने शक्तिशाली साधना नै योग साधना भएको बताए।
थापाले योगको महत्वलाई आत्मसात गर्दै बागमती प्रदेश सरकारले योग प्रवर्द्धनका लागि रु. ५० लाखको बजेट भक्तपुरलाइ विनियोजन गरेको पनि जानकारी गराए।
`प्रदेशका १३ वटै जिल्लामा योग समितिहरू गठन गर्ने कार्य थालिएको छ र योगको स्वामित्व पनि प्रदेश सरकारले लिनेछ भन्ने हाम्रो स्पष्ट प्रतिबद्धता छ।´ मन्त्री थापाले भने।
उनले शारीरिक र मानसिक स्वास्थ्य सुदृढ बनाउँदै बागमती प्रदेशलाई स्वस्थ, सक्षम र सशक्त बनाउने दिशामा यो एउटा महत्वपूर्ण पाइला हुने बताएका हुन्।
बागमती प्रदेश सरकारको उद्देश्य हरेक जिल्ला र हरेक समुदायमा योगको पहुँच पुर्याउनु रहेको भन्दै उनले अघि भने, `हाम्रो उद्देश्य भनेको हरेक जिल्लामा, हरेक समुदायसम्म योगको पहुँच पुर्याउनु हो।´
