काठमाडौं। नेपाली कांग्रेसको भातृ संस्था राष्ट्रिय लोकतान्त्रिक अपाङ्ग संघको प्रथम महाधिवेशनको निर्वाचन प्रक्रियामा १८ जना निर्विरोध निर्वाचित भएका छन।
पार्टी केन्द्रीय कार्यालय सानेपामा शुक्रबारबाट महाधिवेशन जारी छ । शनिबारसम्म चल्ने महाधिवेशनले नयाँ नेतृत्व चयन गर्दैछ। निर्वाचन प्रक्रिया अन्तर्गत आज साँझ उम्मेदवारको मनोनयनपत्र दर्ता रहेकोमा १८ जना निर्विरोध निर्वाचित भएका हुन।
तीमध्ये १४ केन्द्रीय सदस्य माधवप्रसाद चम्लागाईं समूहका छन। निर्विरोध निर्वाचित १४ मध्ये खुला केन्द्रीय सदस्यतर्फ महिला २ जना छन। निर्वाचित भएका महिला सदस्यमा प्रभा आङदम्बे र प्रेमगीता बस्नेत चम्लागाईं समूहका हुन्।
त्यसैगरी केन्द्रीय सदस्यमा निर्विरोध निर्वाचित भएकी हेलेना श्रेष्ठ, अर्जुन तामाङ, अङ्गुरा बस्नेत, बलदेव मण्डल, शोभा लामा, बिरु कमल श्रेष्ठ, कृष्णकुमारी श्रेष्ठ, रजनी शाह, रमा आरसी, जनकबहादुर शाही, कृष्णबहादुर बुढा, देबुकुमारी कामी बिक रहेका छन्।
५१ सदस्य कार्यसमितिमा ३९ पदमा निर्वाचन भइरहेको छ। १८ पदमा निर्विरोध भएपछि बाँकी २१ पदमा शनिबार निर्वाचन हुँदैछ।
१२ पदमा भने कार्यसमितिले मनोनयन गर्नेछ। पार्टी केन्द्रीय कार्यालय सानेपामा शुक्रबार शुरु भएको महाधिवेशन शनिबार नयाँ पदाधिकारीसहितको कार्यसमिति चयन गर्दै सकिनेछ।
संघको नेतृत्वका लागि चम्लागाईंसँगै विकास थापा र कल्पना खड्का चुनावी मैदानमा छन् । निर्विरोध सदस्यहरुमा दुई तिहाई आफ्नो पक्षका पार्न सफल चम्लागाईं बलियो देखिएका छन्।
