ताप्लेजुङ। नेपाल रेडक्रस सोसाइटी ताप्लेजुङ जिल्ला शाखाले जिल्लाको दोभान बजारका आगलागी प्रभावित १७ परिवारलाई गैरखाद्य राहत सामग्री उपलब्ध गराएको छ।
मेरिङ्देन गाउँपालिका–३ खाम्लुङको दोभान बजारमा बिहीबार दिउँसो आगलागी भएको थियो।आगलगागीबाट १० घर पूर्ण रूपमा क्षति भएको छ भने १७ घरपरिवारहरू विस्थापित भएका छन्।
आगलागी भएलगत्तै ताप्लेजुङ जिल्ला शाखाले प्रभावित क्षेत्रमा पुगेर राहत सामग्री वितरण गरेको हो।
जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक विन्देश्वर यादवका अनुसार आगलागीबाट किराना पसल, भाँडावर्तन, लत्ता कपडाका पसलका सामान, अलैँची र घरहरु जलेर ध्वस्त हुँदा १४ करोड ५६ रुपियाँ मूल्य बराबरको क्षति भएको हो।
आगलागीबाट पसलका सामानहरु र घर सहितका संरचना जलेर नष्ट हुनुका साथै केही नगदसमेत जलेको थियो।
दोभान बजारका स्थानीय लाक्पाचुङ शेर्पा (डण्डु) को घरबाट आगलागी सुरु भएको थियो।
