काठमाडौँ। काभ्रेपलाञ्चोक जिल्लाको नमोबुद्ध नगरपालिका-२, बुच्चाकोटमा शुक्रबार भएको बस दुर्घटनाको सत्यतथ्य छानबिन गर्न समिति गठन भएको छ।
प्रहरी प्रधान कार्यालय, नक्सालले शुक्रबार भएको सो दुर्घटनाको छानबिन गर्न नेपाल प्रहरी प्रदेश कार्यालय, काभ्रेका प्रहरी वरिष्ठ उपरीक्षक कमल थापाको संयोजकत्वमा छ सदस्यीय छानबिन समिति गठन गरेको हो।
बनेपाबाट रोशी खार्पाचोकतर्फ जाँदै गरेको बा ३ ख ८३९८ नम्बरको बस अनियन्त्रित भई सडकबाट करिब ३०० मिटर तल खसेको थियो। सो दुर्घटनामा परेर बसमा सवार आठ यात्रुको घटनास्थलमा मृत्यु भएको थियो भने अन्य १६ जना यात्रु घाइते भएका थिए। घाइतेहरूको हाल धुलिखेल अस्पतालमा उपचार जारी छ।
समितिलाई घटनाको वास्तविक अवस्था, कारण तथा जिम्मेवार पक्ष पहिचान गरी सत्य, तथ्य छानबिन गरी सात दिनभित्र प्रतिवेदन पेस गर्न समय दिइएको छ।
मृतक को कहाँका?
यसैबीच सो दुर्घटनामा परेर मृत्यु भएका आठै जनाको पहिचान भएको छ।
जिल्ला प्रहरी कार्यालयले काभ्रेका अनुसार मृत्यु हुनेहरूमा रोशी गाउँपालिका-६ का ७३ वर्षीय मेघबहादुर तामाङ, सोही स्थानका ५५ वर्षीय राजु तामाङ र ७५ वर्षीय इन्द्रबहादुर तामाङ, रोशी-७ की ३४ वर्षीया फूलमाया तामाङ, सोही स्थानकी ६० वर्षीया माया तामाङ, रोशी-८ की ६० वर्षीया प्यारीमाया तामाङ, दैलेख घर भई त्रिनेत्र दल गण भकुण्डेवेँशीमा कार्यरत नेपाली सेनाका ३० वर्षीय अमलदार बमबहादुर भण्डारी र सिन्धुलीको घ्याङ्लेक गाउँपालिका-४ निवासी २२ वर्षीय सुमी तामाङ छन्।
उनीहरूको घटनास्थलमै मृत्यु भएको जिल्ला प्रहरी कार्यालयका सूचना अधिकारी, प्रहरी नायब उपरीक्षक रविन विष्टले जानकारी दिए।
उनका अनुसार दुर्घटनाबारे अनुसन्धान तथा मृतकका आफन्तलाई सम्पर्क गरी आवश्यक कानुनी प्रक्रिया अघि बढाइएको छ।
