काठमाडौँ। नेपालमा आज सुनको मूल्य एकैदिन तोलामा २० हजार भन्दा बढीले वृद्धि भएको छ। सरकारले सुनको भन्सार दर १० प्रतिशत वृद्धि गरेसँगै बजारमा मूल्य बढेको हो।
नेपाल सुनचाँदी व्यवसायी महासंघले सार्वजनिक गरेको विवरण अनुसार आज छापावाल सुनको मूल्य तोलामा २० हजार ५०० रुपैयाँले बढेको हो। सरकारले आगामी आर्थिक वर्षका लागि सुनको भन्सार दरमा १० प्रतिशत वृद्धि गरेपछि बजारमा असर देखिएको ब्यवसायीहरु बताउँछन्।
महासंघका अनुसार आज छापावाल सुनको मूल्य प्रतितोला ३ लाख ११ हजार १०० रुपैयाँ कायम भएको छ। यसअघि गत जेठ १५ गते सुन प्रतितोला २ लाख ९० हजार ६०० रुपैयाँमा कारोबार भएको थियो।
त्यस्तै, १० ग्राम सुनको मूल्य २ लाख ६६ हजार ७२० रुपैयाँ कायम भएको छ।, जुन दुई दिनअघि २ लाख ४९ हजार १४० रुपैयाँ थियो।
यसैगरी बजारमा चाँदीको मूल्य पनि बढेको छ। नेपाली बजारमा आज चाँदी प्रतितोला ५ हजार ३४५ रुपैयाँ पुगेको हो। जेठ १५ गते चाँदी प्रतितोला ५ हजार ४० रुपैयाँमा कारोबार भएको थियो। आज १० ग्राम चाँदीको मूल्य ४ हजार ५८३ रुपैयाँ तोकिएको छ।
