काठमाडौं। राष्ट्रिय स्वतन्त्र पार्टी (रास्वपा) ले आज बिहानैबाट काठमाडौं उपत्यकाका तीन जिल्ला समेट्ने गरि ‘जनसम्पर्क तथा घण्टी अभिवादन कार्यक्रम’ सुरु गरेको छ।
रास्वपाले आज बिहानैबाट काठमाडौँको गौशालाबाट
उपत्यका केन्द्रित `जनसम्पर्क तथा घण्टी अभिवादन कार्यक्रम’ सुरु गरेको हो।
यो कार्यक्रमका लागि काठमाडौं, भक्तपुर र ललितपुरका तीनै जिल्लाका विभिन्न स्थानको रुट तोकिएको छ। यस्तै कार्यक्रममा उम्मेदवारहरुसमेत सहभागी हुने तय छ।
‘एउटै लक्ष्य, एउटै आवाज, एउटै प्रतिबद्धता’ भन्ने मूल नाराका साथ आयोजना गरिएको रास्वपाको यो कार्यक्रमको उद्देश्य जनतासँग प्रत्यक्ष भेटघाट र जनसम्पर्क विस्तार गर्नु रहेको बताइएको छ।
पशुपतिनाथ प्रवेशद्वार नजिकैको गौशालाबाट सुरु भएको यो अभियान बेलुकी ६:३० बजे वनस्थलीस्थित पार्टीको केन्द्रीय कार्यालय बनस्थलीमा पुगेर समापन हुने रास्वपाले जनाएको छ।
पशुपतिनाथबाट सुरु भएको यात्रा चाबहिल, जोरपाटी, साँखु, मुलपानी, पेप्सीकोला हुँदै भक्तपुरको सानोथिमी, दुवाकोट, ब्यासी, कमलविनायक, जगाती र सूर्यविनायक पुग्नेछ।
त्यसपछि जडिबुटी, ग्वार्को, मंगलबजार, जावलाखेल हुँदै ललितपुरको पुलचोकमा पुग्ने कार्यक्रम छ। पुलचोकमा दिउँसो १:०० बजे खानाका लागि छोटो समय छुट्याइएको छ।
दोस्रो चरणमा कालिमाटी दिउँसो २ बजे , टेकु, थापाथली, कीर्तिपुर, बल्खु, सतुंगल, चन्द्रागिरी, सितापाइला, स्वयम्भू, बालाजु, माछापोखरी, टोखा, बुढानीलकण्ठ, सुकेधारा, विशालनगर, बालुवाटार, नक्साल, माइतीदेवी, पुरानो बानेश्वर, नयाँ बानेश्वर, माइतीघर, पुतलीसडक, जमल, लैनचौर, सामाखुसी, गोङ्गबु हुँदै वनस्थली चोकस्थित ‘घण्टी घर’ (रास्वपा केन्द्रीय कार्यालय) मा पुगेर कार्यक्रम समापन हुने गरेर रुट तय गरिएको छ।
