काठमाडौं। पोखराबाट काठमाडौंतर्फ आउदै गरेको रात्री बस धादिङमा दुर्घटना हुँदा १७ जनाको मृत्यु भएको छ भने २४ जना घाइतेको उद्धार गरिएको छ।
सशस्त्र प्रहरीका अनुसार गए राती करिब १:३० बजे धादिङको बेनिघाट रोराङ्ग गाउँ पालिका- ५ भैंसिगौडा अन्तर्गत त्रिशुली नदीमा ग १ ख १४२१ नम्बर यात्रुबाहक बस खसेको थियो।
पोखराबाट काठमाण्डौतर्फ आउदै गरेको सो बस दुर्घटना भएको खबर लगत्तै उद्धारका लागि सशस्त्र प्रहरी बल नेपालको विपद् व्यवस्थापन बेस आदमघाटबाट डीएसपी सुनिल गिरीको कमाण्डमा टोली खटिएको थियो।
यसैगरी दुर्घटना लगत्तै विपद् व्यवस्थापन तालिम शिक्षालय, कुरिनटारबाट गोताखोरसहितको विशेष उद्धार टोली परिचालन गरिएको सशस्त्र प्रहरी बल नेपालका प्रवक्ता डिआइजी विष्णु प्रसाद भट्टले जानकारी दिए।
घाइते हुनेहरूको अझै उद्धार जारी छ भने मृतकहरुको पहिचान गर्ने काम भइरहेको छ।
