काठमाडौं। मेडिकल व्यवसायी दुर्गा प्रसाईंमाथि अनुसन्धान गर्न जिल्ला प्रशासन कार्यालय काठमाडौँले प्रहरीलाई चार दिनको म्याद दिएको छ।
प्रसाईंलाई काठमाडौँ प्रहरीले सोमबार भक्तपुरस्थित आफ्नै निवासबाट पक्राउ गरेको थियो। राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजकसमेत रहेका प्रसाईंलाई जिल्ला प्रहरी परिसर काठमाडौँले म्याद थपका लागि आज जिल्ला प्रशासन कार्यालय काठमाडौंमा पेस गरेको थियो।
निर्वाचनसम्बन्धी अफवाह फैलाएर शान्ति खलल गरेको आरोपमा प्रसाईंलाई सार्वजनिक शान्तिविरुद्धको कसूरमा पक्राउ गरिएको र सोही कसुरमा अनुसन्धानका लागि म्याद थप भएको परिसरका प्रवक्ता, प्रहरी उपरीक्षक पवनकुमार भट्टराईले जानकारी दिए।
प्रसाईंले फागुन २१ मा निर्वाचन हुँदैन भन्दै हिँडेका थिए। यसअघि पनि उनी विभिन्न कसुरमा पटकपटक पक्राउ परेका थिए। केही दिनअघि वीरगञ्ज जान लागेका बेला दक्षिणकालीबाट र त्यसअघि पोखराबाट प्रहरीले उनलाई पक्राउ गरेको थियो।
