काठमाडौँ। नेपाल कम्युनिष्ट पार्टी (एमाले) ले पार्टी अध्यक्ष केपी शर्मा ओलीलाई भावी प्रधानमन्त्रीका रूपमा अघि सारेको छ।
एमालेको केन्द्रीय कार्यालय, च्यासलमा बुधबार आयोजित पत्रकार सम्मेलनमा एमाले उपाध्यक्ष रामबहादुर थापाले पार्टीले अध्यक्ष ओलीलाई भावी प्रधानमन्त्रीका रूपमा अघि सारेको जानकारी दिए।
मुलुकको रक्षा तथा देशभक्त र लोकतान्त्रिक शक्तिहरूलाई पुनःस्थापित गर्नुपर्ने आवश्यकता रहेकाले अध्यक्ष ओलीलाई भावी प्रधानमन्त्रीको प्रस्तावसहित पार्टी चुनावमा होमिएको उपाध्यक्ष थापाले स्पष्ट गरे।
उनले देश बनाउनेहरूलाई जिताउनुपर्ने खाँचो रहेको बताए। नेपालको आर्थिक वृद्धि भइरहेको, समृद्धिको एकीकृत खाकाका साथ काम भइरहेको अवस्थामा अनेक पक्षहरू हावी भएर अघिल्लो सरकारलाई विस्थापन गर्ने स्थिति भएकाले जनताले यस कुरालाई मनन गर्ने विश्वास थापाले व्यक्त गरे।
