काठमाडौं। काठमाडौँको शङ्खरापुर नगरपालिका-३ साँखु जहरसिंहपौवामा पिकनिक खाएर फर्कँदै गरेको बस दुर्घटना हुँदा मृत्यु हुनेको संख्या ५ पुगेको छ।
बुधबार साँझ पिकनिक खाएर फर्कँदै गर्दा बस सडकबाट सय मिटर तल खसेको थियो। सो बस दुर्घटना हुँदा मृत्यु हुनेको सङ्ख्या पाँच पुगेको हो।
जिल्ला प्रहरी परिसर काठमाडौँका प्रवक्ता एवं प्रहरी उपरीक्षक पवन भट्टराईका अनुसार बुधबार चार जनाको मृत्यु भएकामा आज थप एक जनाको मृत्यु भएसँगै मृतकको सङ्ख्या पाँच पुगेको हो।
उनका अनुसार सबै मृतकको सनाखत भएको छ। यस्तै दुर्घटनामा २८ जना घाइते भएका छन्।
मृत्युु हुनेहरू नेपालगञ्जको कोहलपुर नगरपालिका-५ घर भई हाल काठमाडौँको बूढानीलकण्ठ बस्ने ४९ वर्षीया कामना शर्मा, ताप्लेजुङ पाथीभरा-५ घर भई हाल बूढानीलकण्ठ-७ बस्ने ५१ वर्षीया इन्दिरा लिम्बू, सिराह घर भई हाल पेप्सीकोला बस्ने ५५ वर्षीया शान्ति गुप्ता, पाँचथर घर हाल गोठाटार बस्ने अन्दाजी ६५ वर्षीय देवेन्द्र लिम्बू र काठमाडौँ जोरपाटीका ६० वर्षीय अर्जुन लामिछानेको मृत्यु भएको प्रहरी उपरीक्षक भट्टराईले जानकारी दिए।
नेचर हाउस एण्ड हर्व इन्टरनेसनल कम्पनीबाट वनभोज मनाएर फर्कने क्रममा बा४ख ८७८८ नम्बरको महानगर यातायातको बस जहरसिंहपौवामा दुर्घटना भएको थियो।
दुर्घटनामा घाइते भएका २८ मध्ये २३ जनाको काठमाडौँका विभिन्न अस्पतालमा उपचार भइरहेका छ भने पाँच जना उपचारपछि घर फर्किएका छन्।
