बिरगंज। पर्सा प्रहरीले ठूलो परिमाणमा नियन्त्रित लागुऔषध ट्रामाडोलसहित चार जनालाई पक्राउ गरेको छ।
विशेष सूचनाका आधारमा चेक जाँच गर्दा फरक फरक स्थानबाट ७६ हजार १ सय ७० पिस लागुऔषध ट्रामाडोलसहित चार जनालाई पक्राउ गरिएको पर्सा प्रहरीले जनाएको छ।
गत मंगलबार बिरगंज महानगरपालिका वडा नं. १५, प्रतिमाचोकस्थित टिकट काउन्टर अगाडि रोकिएको बागमती प्रदेश ०८–००१ ज ०११७ नम्बरको सार्वजनिक इभि गाडी चेकजाँच गर्दा ६० हजार ५ सय ३० पिस लागुऔषध ट्रामाडोल हाइड्रोक्लोराइड क्याप्सुल आईपीसहित दुई जना पक्राउ परेका थिए।
चेकजाँचको क्रममा दुई जना व्यक्तिहरूले बोकेको रातो र गुलाबी रङ्गको सुटकेसभित्र लुकाइ छिपाइ राखिएको लागुऔषध ट्रामाडोलसहित उनीहरूलाई नियन्त्रणमा लिइएको थियो।
उनीहरूमाथि थप अनुसन्धान पश्चात प्रहरीले बिरगंजकै रामगढवाबाट थप १५ हजार ६ सय ४० पिस ट्रामाडोल समेत बरामद गरेको थियो।
प्रहरीले दुबै स्थानबाट गरेर चार जना व्यक्तिहरूलाई नियन्त्रणमा लिइएको जनाएको छ। दुबै स्थानबाट बरामद भएको लागुऔषधको कुल सङ्ख्या ७६ हजार १ सय ७० पिस रहेको छ।
पक्राउ पर्नेमा बिरगंज महानगरपालिका वडा नं. २४, रामगढवा बस्ने वर्ष २० का युवराज पटेल र वर्ष २१ का अफजल देवान छन्। अन्य दुई जना धादिङ बेनिघाट रोराङ गाउँपालिका वडा नं. ६ बस्ने वर्ष १९ का रामहरि मगर र सिदलेख गाउँपालिका वडा नं. ७ बस्ने वर्ष १९ का राजकुमार मगराती छन्।
पक्राउ परेका निजहरू विरुद्ध लागूऔषध सम्बन्धि कसूरमा पर्सा जिल्ला अदालतबाट ७ दिनको म्याद थप गरी अनुसन्धान भइरहेको जिल्ला प्रहरी कार्यालय पर्साका प्रहरी प्रमुख सुदिपराज पाठकले जानकारी दिए।
