काठमाडौ। औषधि व्यवस्था विभागले क्युरेक्स फर्मास्युटिकल्स प्रालि बनेपाले उत्पादन गरेको रेक्सामोल (पारासिटामोल ट्याब्लेट) को टिआरएक्स–६९५ ब्याच कम गुणस्तरको भएको बताएको छ।
विभागले बुधबार एक सूचना प्रकाशित गर्दै क्युरेक्सले उत्पादन गरेको सो ब्याचको रेक्सामोल बजारबाट तत्काल फिर्ता लैजान निर्देशन दिएको छ।
सूचनामा बजार अनुगमनको क्रममा संकलन गरिएका औषधि राष्ट्रिय औषधि प्रयोगशालामा परीक्षण गर्दा न्यून गुणस्तर भएको पाइएको उल्लेख छ। सोही कारण विभागले औषधि ऐन, २०३५ को दफा १४ बमोजिम विक्रीवितरण रोक्का गरि तुरुन्त बजारबाट फिर्ता गर्न भनेको हो।
विभागले उक्त ब्याच नम्बरको औषधि सिफारिस, विक्रीवितरण तथा प्रयोग नगर्न र नगराउन पनि सबैमा आग्रह गरेको छ।
