काठमाडौं। सशस्त्र प्रहरी अस्पताल बलम्बुमा नर्सिङ अध्ययन सुरु भएको छ।
मंगलबार सशस्त्र प्रहरी महानिरीक्षक राजु अर्यालले अस्पतालमा नर्सिङ सम्बन्धि अध्ययन गराउन ‘एपीएफ नेपाल इन्स्टिच्युट अफ हेल्थ साइन्सेस्’ को शुभारम्भ गरेका हुन्।
सशस्त्र प्रहरी बल नेपालले स्वास्थ्य उपचारको क्षेत्रमा दक्ष जनशक्ति उत्पादन गर्ने लक्ष्यसहित ‘एपीएफ नेपाल इन्स्टिच्युट अफ हेल्थ साइन्सेस्’ सञ्चालनमा ल्याएको हो।
सशस्त्र प्रहरी महानिरीक्षक अर्यालले सो इन्स्टिच्युटको उद्घाटन गर्दै नर्सिङ कोर्सको सुरुआतले सशस्त्र प्रहरीको स्वास्थ्य सेवा र चिकित्सा शिक्षा क्षेत्रमा नयाँ आयाम थपेको बताए।
उनले नर्सिङ पेसा स्वास्थ्य सेवा क्षेत्रको मेरुदण्डका रूपमा रहेको तथा स्वास्थ्यकर्मीहरूलाई आधुनिक, विशेषज्ञ, व्यावसायिक सीप प्रदान गर्नुको साथै मानवीय सेवाप्रति समर्पित बनाउन थप मद्दत पुग्ने बताएको सशस्त्र प्रहरी बलका सह प्रवक्ता शैलेन्द्र थापाले जानकारी दिए।
सो क्रममा महानिरीक्षक अर्यालले स्वास्थ्य र शैक्षिक क्षेत्रसँग सम्बन्धित विषयलाई सधैँ प्राथमिकतामा राखेर अघि बढ्ने प्रतिबद्धता जनाउँदै भविष्यमा मेडिकल कलेज समेत सञ्चालन गर्ने योजना रहेको बताएका थिए।
कार्यक्रममा नेपाल एपीएफ अस्पतालका प्रमुख सशस्त्र प्रहरी नायब महानिरीक्षक डा. रुपक महर्जनले इन्स्टिच्युटमार्फत आगामी दिनहरूमा थप शैक्षिक कार्यक्रम सञ्चालन गरिने जानकारी दिए।
सशस्त्र प्रहरी कल्याणकारी सेवा केन्द्रबाट सञ्चालित उक्त इन्स्टिच्युटलाई गत वैशाखमा प्राविधिक शिक्षा तथा व्यावसायिक तालिम परिषद् (सिटिइभिटी)ले आशयपत्र र साउनमा सम्बन्धन दिएको थियो।
प्रवीणता प्रमाणपत्र तह (नर्सिङ) अध्ययन सुरु गरेको इन्स्टिच्युटमा हालसम्म सःशुल्कतर्फ ३६ र छात्रवृत्तितर्फ तीन गरी ३९ जना विद्यार्थी भर्ना भएका छन्।
