काठमाडौं। नेपालमा हाल वर्षा गराइरहेको मौसमी प्रणाली `मोन्था´ को प्रभाव आज रातिबाट कम हुने भएको छ। जसका कारण आज रातिबाट मौसममा क्रमिक सुधार हुने जल तथा मौसम पूर्वानुमान महाशाखाले जनाएको छ।
तर पश्चिमी वायू र अरब सागरमा बनेको न्यून चापीय प्रणालीको पनि आंशिक प्रभाव रहेकाले केही स्थानमा भने बर्षाको सम्भावना कायमै रहेको महाशाखाको पूर्वानुमान छ।
महाशखाको शुक्रवार साँझको पूर्वानुमान अनुसार आज राति कोशी र मधेश प्रदेशका एक/दुई स्थानमा भारी वर्षाको सम्भावना रहेको छ।
कोशी र मधेश प्रदेशका धेरै स्थान तथा बागमती, गण्डकी र लुम्बीनी प्रदेशका थोरै स्थानहरुमा मध्यम वर्षा हुनसक्नेछ।
यी क्षेत्रका पहाडी भूभागका एक/दुई स्थानमा हल्का वर्षाको सम्भावना छ। देशका उच्च पहाडी तथा हिमाली भूभागका केही स्थानहरूमा मध्यम हिमपातको सम्भावना पनि छ।
शनिवार दिउँसो पनि कोशी प्रदेशका थोरै स्थानहरूमा तथा मधेश, बागमती र गण्डकी प्रदेशका पहाडी भूभागका एक/दुई स्थानमा मध्यम वर्षा हुनसक्नेछ।
कोशी गण्डकी र बाग्मतीका हिमाली तथा उच्च पहाडी भेगका केही स्थानमा हल्का हिमपात हुनसक्ने सम्भावना छ। यीबाहेक अन्य भेगमा मौसम सामान्य बदली रहने महाशाखाले जनाएको छ।
