काठमाडौं। काठमाडौं उपत्यकासहित देशका विभिन्न स्थानमा `मोडिफाइड´ मोटरसाइकलमाथि ट्राफिक प्रहरीले कडाई गरेको छ।
सवारी साधनबाट हुने ध्वनि प्रदूषण नियन्त्रण गर्न भन्दै उपत्यका ट्राफिक प्रहरीले काठमाडौं उपत्यकामा विशेष अभियान नै सुरु गरेको छ।
चर्को आवाजमा हर्न बजाउने र मोटरसाइकलमा गैरकानुनी तरिकाले स्वरुप परिमार्जन गरिएको, साइलेन्सर पाइप बिगारिएको लगायतका मोटरसाइकलमा ट्राफिक प्रहरीले अभियान नै चलाएर कडाई गर्ने नीति लिएको हो। त्यस्ता सवारीसाधनका कारण उत्पन्न हुने ध्वनि प्रदूषणमाथि कडाइ गर्न यो अभियान सुरु गरिएको उपत्यका ट्राफिक प्रहरी कार्यालयले जनाएको छ।
काठमाडौं उपत्यका ट्राफिक प्रहरी कार्यालयका अनुसार पछिल्ला केही दिनयता उपत्यकाका मुख्य सहर काठमाडौँ, ललितपुर र भक्तपुरसहित विभिन्न स्थानमा स्वरूप परिवर्तन गरी ध्वनि निकाल्न दुई सयभन्दा बढी मोटरसाइकललाई नियन्त्रणमा लिइएको छ। यसैगरी पोखरामा पनि कडाई गरिएको छ।
भारी आवाज निकाल्ने मोटरसाइकलहरूलाई नियन्त्रणमा लिई आवश्यक कानुनी प्रक्रिया अघि बढाइएको उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक नवराज अधिकारीले जानकारी दिए।
उनले भने, “हामी सबैको जीवनशैलीमा ध्वनि प्रदूषणले प्रत्यक्ष असर पारिरहेको छ। मोटरसाइकलबाट आउने चर्को आवाजका कारण राति निद्रा लाग्न नसक्ने, तनाव हुने र समाजमा त्रासको वातावरण सिर्जना हुने अवस्था देखियो। रमाइलोको नाममा अरूलाई पीडा दिने प्रवृत्तिविरुद्ध अब कडा निगरानी गरिन्छ।”
सवारी तथा यातायात व्यवस्था ऐनले कम्पनीले तोकेको मापदण्ड अनुसार मात्र सवारी सञ्चालन गर्न दिने व्यवस्था गरेको भए पनि पछिल्लो समय धेरै मोटरसाइकल चालकले यो नियम उल्लङ्घन गर्दै मनपरी साइलेन्सर पाइप परिवर्तन गरी चर्को आवाज निकाल्दै चलाउने गर्न थालेपछि कडाइ गर्नुपरेको उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदी बताउँछन्।
त्यस्ता स्वरुप बिगारिएका मोटरसाइकलका आवाजका कारण सडकमा हिड्ने पैदलयात्री तथा स्थानीयले स्वास्थ्यका दृष्टिकोणले असुरक्षित महसुस गर्ने गरेको प्रहरीले बताउने गरेको छ।
