काठमाडौं। इलामको सन्दकपुरमा तेस्रो `रेडपाण्डा महोत्सव´ आयोजना हुने भएको छ।
इलामको सन्दकपुर गाउपालिका-४ कालपोखरीमा आयोजना हुने तेस्रो `रेडपाण्डा महोत्सव´को तयारी बारे सोमबार काठमाडौँमा पत्रकार सम्मेलन गर्दै जानकारी दिइएको हो। महोत्सव चैत २० गतेदेखि २३ गतेसम्म आयोजना हुनेछ।
दुर्लभ वन्यजन्तु रेडपाण्डाको संरक्षणसँगै पर्यटन प्रवर्द्धन गर्ने तथा स्थानीय पर्यापर्यटनलाई जोड्ने उद्देश्य सहित महोत्सव आयोजना गर्न लागिएको आयोजक समितिका संयोजक तथा सन्दकपुर-२ का वडा अध्यक्ष सनम राईले जानकारी दिए।
इलाममा अन्य जिल्लामा भन्दा धेरै रेडपाण्डा पाइने हुँदा रेड पाण्डा देखाउनकै लागि वार्षिक रुपमा महोत्सव गरिदैं आइएको उनले जानकारी दिएका हुन्। नेपाल, भारत, भुटान, म्यानमार र चीनमा मात्र पाइने रेड पान्डा विश्वमा नै दुर्लभ वन्यजन्तु मानिन्छ।
`पछिल्ला केही वर्षयता तेस्रो मुलुकका पर्यटकहरु पनि इलाममा रेडपाण्डा हेर्नका लागि आउन थालेका छन्, हामीले गृह मन्त्रालयसँग पनि अन्तर्राष्ट्रिय पर्यटकलाई ल्याउने गरेर समन्वय गरेका छौं।´ राईले भने।
गत वर्ष भारतीय सहित अन्य केही मुलुकका गरी ७ हजार पर्यटकले सन्दकपुरको भ्रमण गरेको राईको भनाइ छ।
महोत्सव आयोजक समितिका सदस्य केशब कुमार घौरारीले महोत्सवमार्फत पर्यटकीय सम्भावनाको उजागर गर्ने उद्देश्य लिइएको बताए।
आयोजकले महोत्सवमार्फत स्थानीय समुदायलाई रेडपाण्डा संरक्षणप्रति सचेत गराउनुका साथै हिमाली पदमार्गमा आधारित पर्यटनलाई प्रवर्द्धन गर्ने लक्ष्यसमेत लिएको छ।
इलामको सन्दकपुर गाउँपालिकाको माबु दोवाटे, जौवारी, हाागेथाम, जमुनाको चोयाटार, टप्पु, माईजोगमाईको प्याङ पातल सामुदायिक वन, जोगमाईको माथिल्लो सामुदायिक वन लगायतमा रेडपाण्डा पाइन्छ।
यसअघि २०८० र २०८१ मा दुई संस्करण सफलतापूर्वक महोत्सव सम्पन्न भइसकेको छ। रेडपाण्डा महोत्सवमा ४३ किलोमिटर लामो पदमार्ग जोडिएको छ। जसले माईपोखरीदेखि ढापपोखरी हुँदै जौबारीसम्म जोड्छ। उक्त पदमार्गमा विभिन्न दुर्लभ वन्यजन्तु, मुनालसहितका सयौँ प्रजातिका चराचुरुङ्गी तथा समृद्ध जैविक विविधताको अध्ययन गर्न सकिन्छ।
करिब ११ करोड रुपैयाँभन्दा बढी लागतमा निर्माण गरिएको यस पदमार्ग क्षेत्रमा १५ भन्दा बढी पर्यटकीय गन्तव्यहरू समावेश गरिएको छ।
महोत्सवमार्फत ती गन्तव्यहरूको प्रचार–प्रसार गर्दै आन्तरिक तथा बाह्य पर्यटक भित्र्याउने लक्ष्य राखिएको छ। विशेषगरी छिमेकी पश्चिम बंगाल बाट भारतीय पर्यटक आकर्षित गर्ने योजना समेत रहेको छ।
सन्दकपुर क्षेत्र पूर्वी पहाडी भूभागमा रेडपाण्डा अवलोकनका लागि प्रसिद्ध गन्तव्य मानिन्छ, जहाँ विश्वभरबाट पर्यटक पुग्ने गरेका छन्। महोत्सव अवधिभर आगन्तुकहरूले आदिवासी जनजातिको संस्कृति, सिमसार क्षेत्र, प्राकृतिक सौन्दर्य तथा सगरमाथा सहित ६० भन्दा बढी हिमश्रृङ्खलाको दृश्य अवलोकन गर्न सक्नेछन्।
सन्दकपुर गाउपालिकाका प्रमुख प्रशासकिय अधिकृत दिलकुमार लिम्बूले रेडपाण्डा संरक्षणसँग जोडिएको महोत्सवले सन्दकपुर क्षेत्रमा पर्यापर्यटनको विकास गर्दै स्थानीय पर्यटन व्यवसायलाई थप टेवा पुग्ने अपेक्षा गरिएको बताए।
लिम्बुका अनुसार महोत्सव कार्यक्रमलाई नेपाल पर्यटन बोर्ड, कोशी प्रदेश पर्यटन कार्यालय झापा, केचना–कञ्चनजङ्घा पर्यटन विकास समिति तथा रेड पाण्डा नेटवर्क लगायत संस्थाहरूले प्रवर्द्धन गर्ने भएका छन्।
राष्ट्रिय तथा अन्तर्राष्ट्रिय स्तरमा इलामको पर्यटनलाई चिनाउँदै आएका पत्रकार युवराज गौतमले विश्व समुदायलाई नै इलाममा रेडपाण्डा पाइन्छ भन्ने सन्देश दिन महोत्सव आयोजना गर्न लागिएको बताए।
महोत्सवका आकर्षणका रुपमा हरेक दिन स्थानीय पथप्रदर्शकको सहयोगमा पदयात्रा समेत आयोजना हुनेछ। यस्तै स्थानीय उत्पादनको स्वाद चाख्दै पर्यटकले आनन्द लिन सक्नेछन्।
