काठमाडौं । पूर्वपश्चिम महेन्द्र राजमार्ग अन्तर्गत रौतहटको चन्द्रपुर नगरपालिका–४ लमाह पुल नजिक ग्यास बुलेट पल्टिँदा अवरुद्ध भएको राजमार्ग २४ घण्टापछि सञ्चालनमा आएको छ ।
बुलेटभित्रको २१ टन ग्यास बाहिर फ्याँकेपछि क्रेनको सहयोगमा बुलेट ट्यांकर हटाएर राजमार्ग सञ्चालनमा ल्याइएको रौतहटका प्रहरी निरीक्षक रुद्र कँडेलले एक्सरे नेपाललाई जानकारी दिए ।
उनका अनुसार बुधबार बिहान साढे ७ बजेदेखि राजमार्ग सञ्चालनमा आएको हो ।
दुर्घटनापछि बुलेटबाट लिक भएको ग्यास प्राविधिक टोलीले मंगलबार दिनभरि टाल्ने प्रयास गरेको थियो । उक्त प्रयास असफल भएपछि बुलेटमा भएको सबै ग्यास फ्याँकेर क्रेनको सयहोगमा सडकबाट बुलेट उठाइएको हो ।
भारतको रक्सौलबाट एलपी ग्यास बोकेर धनुषाको महेन्द्रनगरतर्फ जाँदै गरेको यूपी १७ ए टी २११४ नम्बरको ट्यांकर मंगलबार बिहान साढे ७ बजे दुर्घटनामा परेको थियो ।
राजमार्ग नै अवरुद्ध पार्ने गरी बुलेट पल्टिएपछ वैकल्पिक सडक प्रयोग गरी सवारीसाधन सञ्चालनमा ल्याइएको थियो ।
दुर्घटनामा ट्यांकर चालक भारतको कदोरा जिल्ला जयनगर थाना निवासी ३५ वर्षीय पवन यादव घाइते भएका थिए ।
