काठमाडौं। राप्ती स्वास्थ्य विज्ञान प्रतिष्ठानको उपकुलपति पदमा नियुक्तिका लागि आवेदन माग भएको छ।
स्वास्थ्य तथा जनसङ्ख्या मन्त्रालय अन्तर्गतको प्रतिष्ठानमा उपकुलपति पद रिक्त छ। गत असोज २९ गते प्रतिष्ठानका उपकुलपति डा. विकास लामिछानेले पदबाट राजिनामा दिएपछि सो पद रिक्त भएको थियो।
सो पदमा नियुक्तिका लागि बिहीबार प्रतिष्ठानको उपकुलपति सिफारिस समितिको सचिवालयले आवेदन माग गर्दै सूचना प्रकाशित गरेको हो।
सूचनामा प्रतिष्ठान ऐन, २०७४ र नियमावली, २०७४ बमोजिमको योग्यता पुगेका इच्छुक उम्मेदवारहरूलाई आवेदन दिन भनिएको छ।
योग्यता पुगेका व्यक्तिहरूले सूचना प्रकाशन भएको मितिले ७ दिनभित्र (अन्तिम दिन सार्वजनिक बिदा परेमा सोको भोलिपल्ट) सिफारिस समितिको सचिवालय नीति, योजना तथा अनुगमन महाशाखा, स्वास्थ्य तथा जनसङ्ख्या मन्त्रालय सिंहदरबार काठमाडौँमा आवेदन पेस गर्न सक्नेछन्
आवेदनकर्ताले राप्ती स्वास्थ्य विज्ञान प्रतिष्ठान ऐन, २०७४ तथा नियमावली २०७४ मा उल्लेखित योग्यता तथा अनुभवका अतिरिक्त रितपूर्वकको निवेदन र सम्बन्धित प्रतिष्ठानलाई प्रभावकारी रूपमा सञ्चालन गर्न तयार पारिएको सिलबन्दी व्यावसायिक कार्ययोजना संलग्न गरी आवेदन पेस गर्नुपर्नेछ।
आवेदनकर्ताले संलग्न गर्नुपर्ने कागजातको विस्तृत विवरण सिफारिस समितिको सचिवालय वा स्वास्थ्य तथा जनसङ्ख्या मन्त्रालयको वेबसाइट https://mohp.gov.np/ बाट प्राप्त गर्न सक्नेछन्।
