काठमाडौं। ऊर्जा, जलस्रोत तथा सिँचाइ तथा शहरी विकासमन्त्री कुलमान घिसिङले डा. भगवान कोइरालाको नेतृत्वमा बूढानीलकण्ठ–७ हेपाली हाइटमा निर्माणाधीन २०० शैयाको अन्तर्राष्ट्रियस्तरको बाल अस्पतालको निरीक्षण गरेका छन्।
सो अस्पतालको मुख्य भवन निर्माणको काम अहिले अन्तिम चरणमा पुगेको छ। निर्माणाधीन अवस्थामा रहेको सो अस्पताललाई सरकारबाट ४१ रोपनी जग्गा उपलब्ध गराइएको थियो।
सो अस्पताल निर्माणका लागि संघीय सरकारले ११ करोड र बागमती प्रदेश सरकारले १ करोड अनुदान दिने निर्णय गरिसकेका छन्।
निरीक्षणका क्रममा मन्त्री घिसिङले निर्माणाधीन अस्पताललाई आवश्यक सरकारी सहयोग सुनिश्चित गर्ने बताउँदै दाताहरूप्रति आभार व्यक्त गरे।
सो क्रममा मन्त्री घिसिङलाई डा. कोइरालाले अस्पताल गैरनाफामूलक रहने, सबै वर्गका बालबालिकाले गुणस्तरीय सेवा पाउने र आगामी दिनमा कर्णालीसहित सातै प्रदेशमा बाल अस्पताल विस्तार गर्ने जानकारी गराएका थिए।
यसअघि घिसिङले कियोजले दमकमा सञ्चालन गरेको बाल अस्पतालको समेत निरीक्षण गरेका थिए।
