सिमरा। नेकपा एमालेका महासचिव शंकर पोखरेल र महेश बस्नेत लगायतका नेताहरु बाराको सिमरा आउने भएपछि जेन-जीहरुले सिमरा विमानस्थल बन्द गराएका छन्।
अहिले सिमारामा जेन-जीका प्रदर्शनकारीहरु प्रदर्शनमा उत्रिएपछि विमानस्थलको मुख्य प्रवेशद्वार नै बन्द गरिएको छ। यस्तै विमानस्थलको सुरक्षाका लागि सशस्त्र प्रहरी र नेपाल प्रहरी बाक्लो संख्यामा खटाइएको छ।
जेन-जीको प्रदर्शनका कारण अहिले सिमरा एयरपोर्ट रोडका पसलहरु बन्द छन् भने प्रदर्शनकारीले प्रदर्शन जारी राखेका छन्।
आज बिहानै सिमरामा एमालेका कार्यकर्ता र जेन-जी युवाहरूबिच हातहालाहाल भएको थियो। त्यसपछि सिमरामा जेन-जीहरु बाक्लो संख्यामा उपस्थित भएका थिए। जेन-जीका युवाहरुको बाक्लो उपस्थितिपछि एमालेका कार्यकर्ताहरु तितरबितर भएका छन्।
तर जेन-जीहरुले भने अहिले एमालेविरुद्ध नारावाजी गरिरहेका छन्। बाराको परवानीपुरमा एमालेले आयोजना गरेको कार्यक्रममा सहभागी हुन एमाले नेताहरू सिमरा हुँदै आउने कार्यक्रम छ।
