चेन्नाई,(एजेन्सी)। भारतीय प्रहरीले २१ बालबालिकाको मृत्युमा संलग्न औषधि कम्पनीका मालिकलाई पक्राउ गरेर अनुसन्धान थालेको छ।
अधिकारीहरूका अनुसार चेन्नाईस्थित आफ्नै घरमा पक्राउ परेका ७५ वर्षीय जी रङ्गनाथनलाई गैरकानूनी हत्या र लागूऔषधमा मिलावट गरेको आरोप लगाइएको छ।
मध्य प्रदेश राज्यमा गत महिना कम उमेरका बालबालिकाहरूको घातक विषाक्त पदार्थले दूषित खोकी सिरफ सेवनपछि मृत्यु भएको थियो। सो सिरफ दक्षिणी भारतको तमिलनाडु राज्यस्थित स्रेसन फार्मा युनिटमा ‘कोल्ड्रिफ’ ब्रान्ड नामले उत्पादन गरिएको थियो।
भारतीय स्वास्थ्य मन्त्रालयको परीक्षणले सिरफमा डाइथाइलिन ग्लाइकोल (डिईजी) भएको पुष्टि गरेको छ, जुन औद्योगिक सम्मिश्रण हो र थोरै मात्रामा सेवन गरे पनि घातक हुन सक्छ।
यस प्रकरणपछि मध्य प्रदेश र अन्य राज्यहरूले उक्त सिरफमा प्रतिबन्ध लगाएका छन्। विश्व स्वास्थ्य सङ्गठनले पनि भारतीय अधिकारीहरूलाई सो सिरफ अन्य देशमा निर्यात गरिएको छ कि छैन भनेर स्पष्टीकरण मागेको छ।
यो घटना भारतमा मात्रै सीमित छैन। सन् २०२२ मा भारतबाट आयात गरिएको दूषित सिरफ खाएपछि गाम्बियामा ७० भन्दा बढी बालबालिकाको मृत्यु भएको थियो। उज्बेकिस्तानमा पनि २०२२–२०२३ बीचमा भारतमा उत्पादित दूषित सिरफ सेवन गर्दा ६८ बालबालिकाको मृत्यु भएको थियो।
घटनाले भारतको औषधि उद्योगको प्रतिष्ठामा गम्भीर धक्का पुगेको छ र विश्वभरका स्वास्थ्य अधिकारीहरूलाई सतर्क बनाएको छ।
