काठमाडौं। जनकपुरबाट काठमाडौंका लागि उडेको बुद्ध एयरको उडान नम्बर ५०६ भएको विमानको पाङ्ग्रा जनकपुरबाट उड्दै गर्दा खसेपछि पाङ्ग्रा बिना नै काठमाडौंमा अवतरण गरेको छ।
जनकपुरबाट काठमाडौं अवतरण गरेपछि बुद्धको उडान नम्बर ५०६ भएको ९ एन-एएनएच विमानको अगाडिको पाङ्ग्रा जनकपुरमा नै खसेको बताइएको छ। जहाजको अगाडिको पाङ्ग्रा खसेको बारे अवतरणपछि मात्र चालकदलले जानकारी पाएका थिए। त्यसपछि खोजी हुँदा उड्ने क्रममा जनकपुरमै खसेको पाइएको हो।
बिहिबार बेलुका उडानका क्रममा बुद्धको विमानको अगाडिको एउटा पाङ्ग्रा नहुँदा पनि विमान भने सकुशल अवतरण गर्न सफल भएको हो। सो बिमानमा ६२ यात्रु थिए।
नेपाल नागरिक उड्डयन प्राधिकरण सूचना अधिकारी ज्ञानेन्द्र भूलले विमान अवतरण पश्चात् पोस्ट फ्लाइट चेक गर्दा अगाडिको नोज ल्यान्डिङ गियरको एउटा टायर नभेटिएको र खोजी गर्दा जनकपुरमा खसेको जानकारी आएको बताए। घटना बारे थप अनुसन्धान थालिएको भुलले जानकारी दिए।
