काठमाडौं। भारत उत्तर प्रदेशको प्रयागराजमा जारी महाकुम्भ मेला दर्शन गरेर फर्कँदै गर्दा सवारी दुर्घटना परेर ५ जना नेपालीको मृत्यु भएको छ। यस्तै चार जना घाइते छन।
मृत्यु हुने सबै महोत्तरी जिल्लाका छन। जिल्ला प्रहरी कार्यालय महोत्तरीका अनुसार भारतको मधुवनीस्थित मुख्य सडकमा शनिबार दिउसो बीआर ३२ पीए ४६६१ नम्बरको नेपाली नागरिक सवार स्कर्पियो दुर्घटना भएको हो।
मृत्यु हुनेमा महोत्तरीको जलेश्वर नगरपालिका ७ बस्ने ६० वर्षीय बालकृष्ण झा, उनकी पत्नी ५० वर्षीया इन्दु देवी, महोत्तरीकै मनरासिश्वा नगरपालिका २ बस्ने ५० वर्षीया मनतारणी देवी, धनुषा जिल्लाको गङ्गुली बस्ने ३० वर्षीया अर्चना झा र चालक शम्भु ठाकुर छन।
दुर्घटनामा मनोहर ठाकुर, कामिनी झा , सृष्टि ठाकुर र जगतारण देवी घाइते भएका छन्। घाइतेहरुको मजफरपुरको एक अस्पतालमा उपचार भइरहेको छ। घाइते र मृतक दुई परिवारका आफन्त हुन।
तीव्र गतिका कारण गाडी दुर्घटनामा परेको प्रारम्भिक जानकारी आएको प्रहरीले जनाएको छ। प्रारम्भिक अनुसन्धानअनुसार दुर्घटनाको समयमा गाडीको एयरब्याग नखुलेका कारण क्षति भएको भारतीय संचार माध्यमहरुले जनाएका छन।
