काठमाडौँ। सप्तरीको भेटेरिनरी अस्पताल तथा पशु सेवा विज्ञ केन्द्र, राजविराजका कार्यालय प्रमुख डा. रामपवित्र दाससहित दुई जनाविरुद्ध गैरकानुनी घुस रकम मागेको अभियोगमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
अख्तियारका प्रवक्ता सुरेश न्यौपानेका अनुसार खोप कार्यक्रम सम्पन्न गर्न नियुक्त गरिएका भ्याक्सिनेटरहरूलाई कानुन बमोजिम पाउनुपर्ने पारिश्रमिक रकम भुक्तानी दिने क्रममा २० प्रतिशत रकम घुस मागेको पुष्टि भएपछि मुद्दा दायर गरिएको हो।
कार्यालय प्रमुख डा. दासले सवारी चालक भोगेन्द्र यादवसँगको मिलेमतो तथा योजनामा भुक्तानी रकमको कम्तीमा २० प्रतिशत रकम घुस चाहिने भनी मोलमोलाइ गरी सेवाग्राहीलाई बाध्यतामा पारेको आयोगको अनुसन्धानबाट खुलेको छ।
आयोगले एक लाख ३२ हजार ३५० रुपियाँ बिगो कायम गरी भ्रष्टाचार निवारण ऐन, २०५९ बमोजिम सजाय र जरिवानाको मागदाबीसहित बुधबार विशेष अदालत काठमाडौँमा आरोपपत्र दायर गरेको जनाएको छ।
