काठमाडौँ। स्वास्थ्य तथा खाद्य स्वच्छता मन्त्री निशा मेहताले सातै प्रदेशमा जलन उपचार र मानसिक स्वास्थ्य सेवा सुदृढ गर्न निर्देशन दिएकी छन्।
नवनियुक्त स्वास्थ्य विज्ञान प्रतिष्ठानका उपकुलपतिहरूसँग बुधबार भर्चुअल बैठक गर्दै मन्त्री मेहताले यस्तो निर्देशन सहित आवश्यक तयारीमा लाग्न भनेकी हुन्।
बैठकमा मन्त्री मेहताले जलन उपचार र मानसिक स्वास्थ्य सेवाको पहुँच तथा गुणस्तर सुधारलाई प्राथमिकतामा राख्दै सबै प्रदेशमा सेवा विस्तार र सुदृढीकरणका लागि आवश्यक समन्वय तथा कार्यान्वयनलाई तीव्रता दिन निर्देशन दिएको उनको सचिवालयले जनाएको छ।
बैठकमा देशभर जलन (Burn) उपचार व्यवस्थापनको वर्तमान अवस्था, उपलब्ध सेवा, चुनौती तथा आगामी कार्ययोजनाबारे विस्तृत समीक्षा भएको थियो।
यस्तै बैठकमा प्रत्येक स्वास्थ्य विज्ञान प्रतिष्ठानले आफ्नो संस्थामा सञ्चालित जलन उपचार सेवाको अवस्था, उपलब्ध स्रोत–साधन तथा भावी योजना प्रस्तुत गरेका थिए।
बैठकमार्फत जलन उपचार सेवालाई प्रभावकारी बनाउन आवश्यक जनशक्ति, तालिम, पूर्वाधार, उपकरण, औषधि तथा अन्य स्रोत–साधनको प्रदेशगत रूपमा विस्तृत नक्साङ्कन (Mapping) गरी सोही आधारमा कार्ययोजना बनाउने निर्णय भएको छ।
त्यसैगरी, स्वास्थ्य विज्ञान प्रतिष्ठानहरूमा सञ्चालनमा रहेका मनोसामाजिक परामर्श केन्द्रलाई थप व्यवस्थित, प्रभावकारी र सेवामुखी बनाउने निर्णय गरिएको छ।
अस्पतालमा उपचारका लागि आउने सेवाग्राहीलाई मनोसामाजिक परामर्श सेवाबारे प्रभावकारी रूपमा जानकारी गराउने तथा आवश्यक परामर्श सहज रूपमा उपलब्ध गराउने विषयमा पनि बैठकमा छलफल भएको थियो।
