धरान। बीपी कोइराला स्वास्थ्य विज्ञान प्रतिष्ठान, धरानबाट अन्यत्र बिरामी पठाउने १२ जना बिचौलिया पक्राउ परेका छन्।
निजी मेडिकलबाट सस्तो मूल्यमा औषधि उपलब्ध गराइदिने तथा प्रतिष्ठानमा आएका बिरामीलाई आर्थिक चलखेल गरी निजी अस्पतालमा उपचारका लागि पठाइएको आरोपमा जिल्ला प्रहरी कार्यालय सुनसरी, इलाका प्रहरी कार्यालय धरान र अस्थायी प्रहरी पोस्ट घोपाबाट खटिएको संयुक्त टोलीले उनीहरूलाई नियन्त्रणमा लिएको हो।
इलाका प्रहरी कार्यालय धरानका अनुसार पक्राउ पर्नेहरूमा सप्तरीका ३७ वर्षीय रञ्जितकुमार चौधरी, सप्तरी राजविराज–६ की २७ वर्षीया रबिना मण्डल, भोजपुर आमचोक–८ का ३५ वर्षीय हस्त श्रेष्ठ, धरान–१५ का २० वर्षीय सागर पोखरेल छन्।
यसैगरी मोरङ लेटाङ–३ का २९ वर्षीय सान्बिन किराती र धरान–६ का २३ वर्षीय मनिष बुढाथोकी, उदयपुर चौदण्डीगढी–५ का ४० वर्षीय उमेशकुमार चौधरी, धरान–१७ का ३५ वर्षीय धिरोज निरौला, इटहरी–२ का ३१ वर्षीय रोहित मेहता, धरान–११ का १८ वर्षीय विनोद भट्टराई, झापा दमक–१ का ४३ वर्षीय प्रवीण पोखरेल र सुनसरी हरिनगर गाउँपालिका–४ का २७ वर्षीय दीपक राम पनि पक्राउ परेका छन् ।
प्रहरीले उनीहरूविरुद्ध मुद्दा दर्ता गरी जिल्ला प्रशासन कार्यालय सुनसरीबाट १० दिनको म्याद थपका लागि अनुमति लिएको छ।
पक्राउ परेका १२ जना उपर इलाका प्रहरी कार्यालय धरानबाट अनुसन्धान भइरहेको जिल्ला प्रहरी कार्यालय सुनसरीका सूचना अधिकारी एवं प्रहरी नायब उपरीक्षक चन्द्रबहादुर खड्काले जानकारी दिए।
प्रहरीका अनुसार पक्राउ परेका दीपक रामले बोकेको छालाको पर्सबाट विराटनगरस्थित आर्या न्युरो अस्पतालको भिजिटिङ कार्ड बरामद भएको छ। यस्तै उनीहरूको साथबाट बरामद मोबाइल फोनको प्रारम्भिक परीक्षण गर्दा विभिन्न सरकारी अस्पतालका बिरामीहरूको प्रेस्क्रिप्सन, डिस्चार्ज कागजातका तस्बिर, बिरामीको नाम, रोग र उमेरसहितका विवरण अन्य व्यक्तिलाई पठाइएको रेकर्ड तथा एम्बुलेन्स चालकहरूको नाम र सम्पर्क नम्बर उल्लेख भएका कागजातका तस्बिर फेला परेका छन्।
प्रहरीले यी सबै प्रमाणलाई आधार मानेर अस्पतालमा सक्रिय बिचौलियाको सम्भावित सञ्जालको खोजी गरिरहेको छ।
