काठमाडौं। सिंहदरबार परिसर भित्रै निजामती कर्मचारी अस्पतालको सेवा इकाई सञ्चालनमा आएको छ।
आज (शुक्रबार) देखि संघीय मामिला तथा सामान्य प्रशासन मन्त्रालय भवनको तल्लो तलामा सेवा इकाई सञ्चालनमा ल्याइएको हो। सेवा इकाईको शुभारम्भ संघीय मामिला तथा सामान्य प्रशासन मन्त्री प्रतिभा रावलले गरेकी हुन्।
संघीय मामिला तथा सामान्य प्रशासन मन्त्रालयका अनुसार कर्मचारीहरूले स्वास्थ्य सेवाका लागि अस्पतालसम्म धाउनुपर्ने बाध्यता कम गर्न कार्यस्थलमै स्वास्थ्य सेवा उपलब्ध गराइएको हो। निजामती कर्मचारी अस्पतालमा बढ्दो सेवाग्राहीको चाप व्यवस्थापन गर्न मन्त्रालयमै स्वास्थ्य सेवा इकाई राखिएको मन्त्रालयले जनाएको छ।
निजामती कर्मचारीलाई सहज र छिटो स्वास्थ्य सेवा उपलब्ध गराउने उद्देश्यले अस्पतालको सेवा इकाई संचालनमा ल्याइएको सिभिल अस्पतालले जनाएको छ।
उक्त सेवा निजामती कर्मचारी तथा सेवाग्राहीलाई लक्षित गरी स्वास्थ्य परीक्षण, रगत परीक्षण लगायतका स्वास्थ्य सेवाहरू उपलब्ध गराइनेछ।
