काठमाडौँ। सरकारी अस्पतालहरूमा बिग्रिएका स्वास्थ्य उपकरणहरूको पहिचान गरी मर्मत गर्ने विषयमा स्वास्थ्य तथा खाद्य स्वच्छता मन्त्री निशा मेहता र संसद महावीर पुनबीच छलफल भएको छ।
राष्ट्रिय आविष्कार केन्द्रमार्फत सरकारी अस्पतालहरूमा बिग्रिएका स्वास्थ्य उपकरणहरूको पहिचान गरी मर्मत गर्ने विषयमा छलफल भएको हो।
सो क्रममा पुनले विगतमा पनि बिग्रिएका स्वास्थ्य उपकरणहरू मर्मत सम्भार गरी सञ्चालनमा ल्याइएको बताएका थिए भने मन्त्री मेहताले त्यस्ता उपकरण मर्मत गरि प्रयोगमा ल्याउन सरकार तयार रहेको बताएकी थिइन्।
यसअघि प्रदीप पौडेल स्वास्थ्य मन्त्री हुँदासमेत सरकारी अस्पतालमा बिग्रिएका स्वास्थ्य उपकरणहरूको पहिचान गरी मर्मत गर्न सम्झौता भएको थियो। सम्झौतापछि राष्ट्रिय आविष्कार केन्द्रमार्फत ती उपकरणहरु मर्मत गरि प्रयोगमा ल्याइएको थियो।
