काठमाडौ। नेपाल चिकित्सक संघको केन्द्रीय कार्यकारिणी समिति (२०८२-२०८५) का लागि काठमाडौं उपत्यका भित्र भोलि शुक्रबार र पर्सि शनिबार मतदान हुँदैछ।
यसअघि नयाँ नेतृत्व चयन गर्न पहिलो चरणको निर्वाचन अन्तर्गत काठमाडौँ उपत्यका बाहिर तोकिएको मतदान सम्पन्न भइसकेको छ। अब दोस्रो चरणको निर्वाचन अन्तर्गत उपत्यका भित्र मतदान सम्पन्न भएपछि मतगणना हुनेछ।
उपत्यकाको मतदान शुक्रबार विहान ८ बजेदेखि कमलादीस्थित नेपाल प्रज्ञा प्रतिष्ठान परिसरमा सुरु हुने केन्द्रीय निर्वाचन समितिका प्रमुख निर्वाचन अधिकृत डा प्रणयरत्न शाक्यले जानकारी दिए। मतदानका लागि बेलुका ६ बजेसम्मको समय तोकिएको छ।
केन्द्रीय निर्वाचन समितिका अनुसार संघको केन्द्रीय कार्यकारिणी समिति (२०८२-२०८५) का लागि बैशाख ४ र ५ गते काठमाडौँ उपत्यका बाहिर सम्पन्न निर्वाचनमा पहिलो दिन १ हजार ९४२ र दोस्रो दिन २ हजार ३०२ गरि कुल ४ हजार २४४ मत खसेको थियो।
निर्वाचन समितिका अनुसार उपत्यका बाहिर २२ वटा मतदान केन्द्र तोकिएको थियो। जसमध्ये सबैभन्दा बढी ५४८ मत चितवनमा खसेको निर्वाचन समितिले जनाएको छ।
यस्तै कोशीमा ५२५ र गण्डकीमा ४६६ मत खसेको थियो। सबैभन्दा कम मत डडेल्धुरा केन्द्रमा खसेको हो। सो केन्द्रमा १८ मत खसेको केन्द्रीय निर्वाचन समितिले जानकारी दिएको छ।
संघको विधानमा १९ सदस्यीय केन्द्रीय कार्यसमिति रहने ब्यवस्था छ। संघको नेतृत्वका लागि यस पटकको निर्वाचनमा तीन वटा प्यानल निर्वाचनमा होमिएको छ।
नेतृत्वका लागि निर्वाचनमा डा. बद्री रिजाल, डा. मंगल रावल र डा. नारायण भुषाल प्यानल बनाएरै मैदानमा भिडेका छन्। तीनै समुहबाट गरि कुल ५५ जना चुनावी प्रतिस्पर्धामा रहेको निर्वाचन समितिले जनाएको छ।
संघको विधानमा अध्यक्ष १, वरिष्ठ उपाध्यक्ष १, प्रत्येक प्रदेशबाट १–१ जना गरी ७ उपाध्यक्ष, महासचिव १, कोषाध्यक्ष १, सहसचिव १, सह-कोषाध्यक्ष १ र सदस्य ६ गरी कुल १९ जनाको केन्द्रीय कार्यसमिति निर्वाचित हुने ब्यवस्था छ।
