काठमाडौं। राष्ट्रिय स्वतन्त्र पार्टी (रास्वपा)का सभापति रबी लामिछानेलाई थप १३ दिन हिरासतमा राख्न अदालतले अनुमति दिएको छ।
आइतबार प्रहरीले लामिछानेलाई म्याद थपका लागि कास्की जिल्ला अदालत उपस्थित गराएकोमा जिल्ला अदालतका न्यायाधीश नवराज दाहालको इजलासले थप १३ दिन हिरासतमा राखेर अनुसन्धान गर्न प्रहरीलाई अनुमति दिएको हो।
यस अघि गत २० कार्तिकमा १० दिनको म्याद थप गर्दै लामिछानेलाई हिरासतमा राखेर अनुसन्धान गर्न अनुमति दिएको थियो। सो म्याद २४ कार्तिक अर्थात हिजो शनिबार सकिएको हो।
कास्की प्रहरीले लामिछाने विरुद्ध सहकारी ठगी, सम्पत्ति शुद्धीकरण र सङ्गठित अपराधको मुद्दामा अनुसन्धान गरिरहेको छ।
लामिछाने २ कार्तिकदेखि अनुसन्धानकै क्रममा जिल्ला प्रहरी कार्यालय कास्कीको हिरासतमा छन। त्यस अघि गत ८ कार्तिकमा ७ दिन हिरासतमा राख्न जिल्ला अदालत कास्कीले प्रहरीलाई अनुमति दिएको थियो।
पहिलोपटक लामिछानेलाई गत ४ कार्तिकमा ६ दिनको म्याद थप भएको थियो। उनी २ कार्तिकमा काठमाडौबाट पक्राउ परेका थिए भने ३ गते शनिबार परेका कारण उनलाई ४ गते अदालत उपस्थित गराइएको थियो।
जिल्ला प्रहरी कार्यालय कास्कीको हिरासतमा उनलाई प्रहरी र जिल्ला सरकारी वकिल कार्यालयले सहकारी ठगी आरोपमा बयान लिइसकेको छ भने बयानको प्रमाणिकरणसमेत सकिसकेको छ।
