काठमाडौं। नेपाल प्रहरी अस्पताल महाराजगन्जमा इन्ट्रा यूटेरिन इन्सेमिनेशन (आईयुआई) सेवाबाट प्रथम शिशुको जन्म भएको छ।
निःसन्तान दम्पतीको बढ्दो चापलाई मध्यनजर गर्दै २०८१ साल कार्तिक २७ गतेबाट शुरु गरीएको आइयुआई सेवाको फल स्वरुप २०८२ साल कार्तिक ३० गते नेपाल प्रहरी अस्पतालमा प्रथम शिशुको जन्म भएको हो।
प्रहरी अस्पतालले सो प्रविधिबाट जन्मिएका शिशुको तस्वीर आफ्नो सामाजिक संजाल फेसबुकबाट सार्वजनिक गरेक छ। तर शिशु र आमाको नामसहित परिचय खुलाइएको छैन।
के हो आईयूआई?
आईयूआई विधिलाई पछिल्लो समय बढ्दो निःसन्तान हुने समस्याको समाधानका लागि चिकित्सकहरूले सहज विधि मान्न थालेका छन्। पाठेघरमा सोझै पुरुषको शुक्रकीट राख्ने विधि नै आईयूआई हो।
महिलाको अण्डा समयमा नबन्ने भएकामा अण्डा बन्ने औषधिहरू दिने, शुक्रकीटको मात्रा कम भएकाहरूको शुक्रकिटलाई सफा गरेर स्वस्थ शुक्रकीटलाई पाठेघरमा राख्ने विधिलाई आईयूआई भनिन्छ। आईयूआई सजिलो, सस्तो र सरल विधि मानिन्छ।
यो विधिबाट गर्भ बस्ने दर ३५ वर्षभन्दा कम उमेरका महिलामा १३ देखि ३० प्रतिशतसम्म हुन्छ। ३५ वर्ष उमेर कटेका महिलामा यसको सफलतादर ९ प्रतिशतभन्दा कम हुने गरेको चिकित्सकहरु बताउँछन्।
चिकित्सकहरुका अनुसार आईयूआई ६ साइकलभन्दा बढी गर्न मिल्दैन। ६ पटकसम्म पनि गर्भवती नभएको अवस्थामा महिलाहरूलाई आईभीएफमा जान सल्लाह दिने गरिएको छ।
