काठमाडौं। देशभर डेंगी संक्रमितको संख्या बढेको छ। जनवरीयता मंगलबारसम्म डेंगीको सङ्क्रमण पाँच हजारको नजिक पुगेको छ।
इपिडिमियोलोजी तथा सरुवा रोग नियन्त्रण महाशाखाका अनुसार देशभर ४ हजार ८१४ जनामा डेंगी सङ्क्रमण पुष्टि भएको छ।
महाशाखाका किटजन्य रोग शाखा प्रमुख डा. गोकर्णप्रसाद दाहालले ४ हजार ८१४ जनामा सङ्क्रमण देखिएको जानकारी दिए। उनका अनुसार डोल्पा, हुम्ला र मनाङ् जिल्लाबाहेक सबैजसो जिल्लामा सङ्क्रमण देखिएको छ।
डेंगी सङ्क्रमणबाट हालसम्म दुई जनाको मृत्यु भइसकेको छ। डा. दाहालले पानी पर्न रोकिएसँगै अब जाडो मौसम सुरु हुन थालेपछि डेंगी सङ्क्रमणको जोखिम कम हुन सक्ने बताए।
महाशाखाको तथ्याङ्कअनुसार कोशी प्रदेशमा ७१४, मधेश प्रदेशमा ९५, बागमती प्रदेशमा १ हजार ६४, गण्डकी प्रदेशमा १ हजार २७३ जना, लुम्बिनी प्रदेशमा ८४३, कर्णाली प्रदेशमा २७० र सुदूरपश्चिम प्रदेशमा ५५५ जनामा डेंगी सङ्क्रमण देखिएको छ।
