काठमाडौं। डेंगी संक्रमणबाट काठमाडौंको टेकु अस्पतालमा उपचाररत एक युवतीको मृत्युु भएको छ।
मंगलबार अस्पताल भर्ना भएकी २४ वर्षीया ती युवतीको टेकु अस्पतालमा आईसीयूमा उपचार भइरहेको थियो। उनको बुधबार मृत्यु भएको हो।
अस्पतालका प्रमुख कन्सल्टेन्ट फिजिसियन डा. विमल चालिसेका अनुसार ती युवती अस्पतालमा उपचारका लागि आउँदा नै स्वास्थ्य अवस्था जटिल थियो। तर पनि उनलाई आइसियुमा राखेर उपचार गरिंदै थियो।
`उहाँ अस्पताल आउँदा नै सिरियस हुनुहुन्थ्यो, तर पनि आइसियुमा राखेर उपचार हुँदै थियो। उहाँको उपचारकै क्रममा निधन भयो।´ डा चालिसेले भने।
इपिडिमियोलोजी तथा रोग नियन्त्रण महाशाखा (ईडीसीडी) को पछिल्लो तथ्यांक अनुसार यस वर्ष हालसम्म २ हजार ९५२ जनामा डेंगी संक्रमण पुष्टि भएको छ।
यस्तै तीन जिल्ला बाहेक ७४ जिल्लामा डेंगी फैलिएको छ। गत साताको तथ्यांकअनुसार मात्रै १८० जना नयाँ संक्रमित थपिएका छन्।
ईडीसीडीका अनुसार बागमती प्रदेशमा २९८ जनामा यस वर्ष डेंगी संक्रमण पुष्टि भएको छ। यस्तै कोशीमा ४७, गण्डकीमा २७, सुदूरपश्चिममा २४, लुम्बिनीमा २२, मधेशमा १८ र कर्णालीमा ६ जनामा डेंगी संक्रमण पुष्टि भएको छ।
