सिन्धुली। जापानिज इन्सेफलाइटिसबाट सिन्धुलीमा एक वृद्धको मृत्यु भएको छ।
लामखुट्टेको टोकाइबाट सर्ने जापानिज इन्सेफलाइटिसबाट मंगलबार कमलामाई नगरपालिका–४, साङ्बाले हायुटार निवासी ७९ वर्षीय दीपबहादुर कार्कीको मृत्यु भएको हो।
जनस्वास्थ्य कार्यालय सिन्धुलीका ल्याब टेक्निसियन गङ्गाराम कार्कीका अनुसार दीपकबहादुरको धुलिखेल अस्पतालबाट उपचार गरी घर ल्याउने क्रममा बाटोमा नै मृत्यु भएको हो।
गत वर्ष पनि सिन्धुलीको दुधौलीमा ५७ वर्षका एक पुरुषको जापानिज इन्सेफलाइटिसबाट मृत्यु भएको थियो। यस्तै अर्का एक अहिलेसम्म अचेत अवस्थामा छन्। उनी दुधौली नगरपालिका–१४, ककुरठाकुरका रामबहादुर मगर हुन्।
जनस्वास्थ्य कार्यालय सिन्धुलीका ल्याब टेक्निसियन कार्कीका अनुसार जापानिज इन्सेफलाइटिस रोगबाट सङ्क्रमित सुगुर, हाँस लगायतका पशुपक्षीलाई टोकेको लामखुट्टेले मानिसलाई टोक्दा उक्त रोग सर्दछ। तर मानिसबाट मानिसमा भने यो रोग नसर्ने उनको भनाइ छ।
सो रोग विरुद्ध बालबालिकालाई भ्याक्सिन लगाउने लगायत जनचेतना मुलक कार्यक्रम गर्ने काम भइरहेको कार्यालयले जनाएको छ ।
