काठमाडौं। नेपाल प्रहरी श्रीमती संघले नि:शुल्क स्वास्थ्य शिविर तथा खानेपानी वितरण कार्यक्रम आयोजना गरेको छ।
नेपाल प्रहरी श्रीमती संघ भृकुटीमण्डप काठमाडौंको आयोजना तथा नेपाल प्रहरी अस्पताल महाराजगंजको प्राविधिक सहयोगमा पशुपतिनाथ मन्दिर परिसरमा आयोजित कार्यक्रममा दुई सय जनाले स्वास्थ्य परीक्षण गराएका हुन।
श्रावण महिनाको दोस्रो सोमबार मन्दिरमा आउने भक्तजनहरुलाई लक्षित गरी नि:शुल्क स्वास्थ्य शिविर तथा खानेपानी वितरण कार्यक्रम आयोजना गरिएको संघले जनाएको छ।
श्रीमती संघकी अध्यक्ष रुपा थापाको प्रमुख आतिथ्यतामा सम्पन्न उक्त कार्यक्रममा संघका महासचिव अनुश्री पाख्रीन, उपाध्यक्षहरु, कार्यसमितिका पदाधिकारीहरु तथा आसरा सुधार केन्द्र रानीबारी काठमाडौंका पदाधिकारी र प्रहरी कर्मचारीहरु समेतको उपस्थिति थियो।
