कास्की। सहकारी ठगी प्रकरणमा प्रहरी हिरासतमा रहेका सात जनालाई जिल्ला अदालत कास्कीले धरौटीमा छाड्न आदेश दिएपछि ६ जना धरौटी रकम बुझाएर रिहा भएका छन्।
तर लीला पछाईंले भने बिहीबार राती सवा आठ बज्दासम्म धरौटी रकम बुझाउन सकेकी छैनन्।
सूर्यदर्शन सहकारी बचत रकम अपचलन मुद्दामा प्रहरी हिरासतमा रहेका ७ जनालाई बिहीबार कास्की जिल्ला अदालतले धरौटीमा छाड्न आदेश दिएको थियो।
राष्ट्रिय स्वतन्त्र पार्टी (रास्वपा) सभापति रवि लामिछानेसहित ७ जनालाई धरौटीमा रिहा गर्न आदेश दिएकोमा लामिछानेसहित ६ जनाले धरौटी रकम बुझाएका हुन्। लामिछानेले बैंक ग्यारेन्टीमार्फत धरौटी रकम बुझाएको कास्की प्रहरीले जनाएको छ।
धरौटी रकम बुझाउनेमा आरती गुरुङ, पूर्वसांसद मीना गुरुङ, कृष्णबहादुर गुरुङ छन्। आरती र मीनालाई ५–५ लाख रुपैयाँ तथा कृष्णलाई १ लाख रुपैयाँ धरौटी माग गरिएको थियो।
यसैगरी लामिछानेलाई ६५ लाख, पूर्वडीआईजी छविलाल जोशीलाई ८८ लाख, राम खनाललाई १५ लाख धरौटी माग गरिएकोमा जोशी र खनालले पनि धरौटी रकम बैंक ग्यारेन्टीमार्फत बुझाएका छन।
उनीहरू बिहीबार राती नै हिरासतमुक्त भएका छन्। तर अन्यत्र जिल्लामासमेत मुद्दा भएकाहरुलाई प्रहरीले पुन: पक्राउ गर्न सक्छ वा सम्बन्धित जिल्ला अदालतमा आफै उपस्थित हुनेगरी रिहा हुन पाउने छन्।
