काठमाडौँ। भदौ १० गते रसुवाको भोटेकोशीमा आएको बाढीबाट पीडित बनेकी विष्णुकुमारी डंगोलको काठमाडौं मेडिकल कलेज (केएमसी) मा निःशुल्क मिर्गौला प्रत्यारोपण गरिएको छ।
केएमसीका संचालक डा. सुनिल शर्माले बाढीपीडितहरुको निःशुल्क मिर्गौला प्रत्यारोपण गर्ने घोषणा गरेका थिए। सो घोषणापछि उपचारका लागि अस्पताल आएकी विष्णुकुमारीको सफलतापूर्वक निःशुल्क मिर्गौला प्रत्यारोपण गरिएको हो।
उनी मिर्गौला प्रत्यारोपणपछि पूर्ण रूपमा स्वस्थ भई डिस्चार्ज भएकी छन्। उनलाई पति राजकुमार डंगोलले मिर्गौला दान गरेको अस्पतालले जनाएको छ। राजकुमार पनि पत्नीसँगै डिस्चार्ज भएका छन्।
विष्णुकुमारी दम्पतीको भोटेकोशी बाढीले घरबार मात्रै होइन, वर्षौंसम्म थोपा–थोपा जोडेर उपचारका लागि जम्मा पारेको पैसासमेत बगाएको थियो। जीवन र मृत्युको दोसाँधमा पुगेकी ४१ वर्षीया विष्णुकुमारीको दयनीय अवस्थाबारे सामाजिक सञ्जालमार्फत जानकारी पाएपछि नेपाली कांग्रेसका नेतासमेत रहेका केएमसीका सञ्चालक डा. शर्माले उनीहरूको सम्पूर्ण उपचार निःशुल्क गरिदिने घोषणा गरेका थिए।
साथै, उनले बिरामी तथा मिर्गौला दाताका लागि खानपिनको समेत विशेष व्यवस्था मिलाएका थिए।शर्माको घोषणा लगत्तै केएमसीको विज्ञ चिकित्सक टोलीले विष्णुकुमारीको मिर्गौला प्रत्यारोपण प्रक्रिया अगाडि बढाएको थियो।
मिर्गौला प्रत्यारोपण सफलतापूर्वक सम्पन्न भएपछि पूर्ण रूपमा स्वस्थ भई अस्पतालबाट घर फर्किंदै गर्दा डंगोल दम्पतीले उपचारमा संलग्न ट्रान्सप्लान्ट सर्जन डा. सुरेश महर्जन, डा. विजयमानसिंह कटुवाल , डा. अनील पोख्रेलसहित सम्पूर्ण चिकित्सक टोलीलाई भावुक हुँदै हृदयदेखि नै आभार प्रकट गरेका छन्।
नेता शर्मा र केएमसी अस्पतालबाट प्राप्त यो मानवीय सहयोगबाट भावविह्वल बनेका राजकुमारले यो कठिन घडीमा आफूहरूले वास्तविक जीवनमा भगवान् नै भेटेको अनुभव सुनाए।
“हाम्रो सर्वस्व बगायो भन्ने पीडा त छँदै थियो, तर आज भगवान रुपी सुनील सरले हामीलाई नयाँ जीवन दिनुभयो। हामीले संसारमा सत्कर्म गर्ने मानिसहरू अझै जीवित छन् भन्ने महसुस गरेका छौँ। उहाँप्रति हाम्रो कोटी–कोटी नमन छ।” विष्णुकुमारीका श्रीमान् राजकुमारले भने।
काठमाडौं मेडिकल कलेज (केएमसी) मा अहिलेसम्म गरिएका सबै मिर्गौला प्रत्यारोपण शतप्रतिशत सफल भएका छन्। विष्णुकुमारी यही अस्पतालमा सफल मिर्गौला प्रत्यारोपण गराउने ८६औँ बिरामी हुन्।
विपद्को समयमा पीडित नागरिकको पीडालाई आफ्नै परिवारको पीडाझैँ आत्मसात् गर्ने नेता शर्माले यसअघि नै बाढीपीडितहरूका लागि आफ्नो अस्पतालका ढोकाहरू निःशुल्क खुला रहने घोषणा गरिसकेका छन्।
‘अब पैसा नभएका कारण कुनै पनि नेपालीले अकालमा ज्यान गुमाउनु नपरोस्’ भन्ने उनको दृढ संकल्प आज विष्णुकुमारीजस्ता सयौँ विपन्न बिरामीहरूका लागि जीवनको ठूलो सहारा बनेको छ।
