मकवानपुर। मकवानपुरको भीमफेदी गाउँपालिका ६ जुरीखेलमा स्कारपियो दुर्घटना हुँदा जनकपुर उच्च अदालत, वीरगन्जका मुख्य न्यायाधीश गोकर्ण डाँगी र रजिष्टार तारादत्त बडुसहित ६ जना घाइते भएका छन्।
जिल्ला प्रहरी कार्यालय मकवानपुरका अनुसार मंगलबार बिहान करिब ७ बजे काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको स्कारपियो अनियन्त्रित भई सडकबाट करिब ५०/६० मिटर तल खोल्सामा खसेर दुर्घटना भएको थियो।
घाइतेहरूलाई उद्धार गरी उपचारका लागि भिमफेदीस्थित अस्पताल पठाइएको छ। घाइते मुख्य न्यायाधीश डाँगीको भने टाउको र शरिरको विभिन्न भागमा चोट छ। उनको अवस्था मध्यम रहेको प्रहरीले जनाएको छ।
दुर्घटनामा परी उच्च अदालतका रजिष्टार तारादत्त बडु, उनकी श्रीमती लक्ष्मी बडु, छोरा रितेन्द्र बडु, छोरी रिता बडु र चालक छुनिलाल चौधरी घाइते भएका छन्।
घाइतेमध्ये रजिष्टार बडुकी श्रीमती लक्ष्मीको अवस्था गम्भीर भएको र उनको टाउकोमा चोट रहेको प्रहरीले जनाएको छ। अन्यको अवस्था भने मध्यम छ।
