काठमाडौं। शिक्षा तथा खेलकुदमन्त्री सस्मित पोखरेल सामुदायिक विद्यालयको वास्तविक अवस्था बुझ्न आगैँ विद्यालय पुगेका छन्।
उनले सोमबारबाट काठमाडौंका विभिन्न विद्यालयको अवलोकन सुरु गरेका हुन्।
सामुदायिक विद्यालयको शैक्षिक अवस्था, पठनपाठनको स्थिति, विद्यालय व्यवस्थापन तथा विद्यार्थीका समस्या र आवश्यकताबारे प्रत्यक्ष जानकारी लिन मन्त्रालयले देशभरका सामुदायिक विद्यालयको अवलोकन गर्ने अभियान सुरु गरेको हो।
अभियानअन्तर्गत मन्त्री पोखरेलले सोमबार काठमाडौंका चार सामुदायिक विद्यालयमा पुगेर विद्यालय प्रशासन, प्रधानाध्यापक, शिक्षक तथा विद्यार्थीहरूसँग अन्तरक्रिया गरेका हुन्।
उनले विद्यालयको समग्र अवस्था, पठनपाठनको स्थिति, विद्यार्थीका समस्या तथा विद्यालय सुधारका लागि आवश्यक पहलका विषयमा जानकारी लिएका थिए।
अवलोकनका क्रममा मन्त्री पोखरेलले विद्यालयमा देखिएका समस्या तथा सरोकारवालाबाट प्राप्त सुझावलाई नीतिगत रूपमा सम्बोधन गर्दै सामुदायिक विद्यालयको शैक्षिक गुणस्तर सुधार र विद्यार्थीमैत्री वातावरण निर्माणलाई मन्त्रालयले प्राथमिकतामा राख्ने बताए।
मन्त्री पोखरेलले अवलोकन गरेका विद्यालयहरूमा बाल विकास आधारभूत विद्यालय, पञ्चकन्या माध्यमिक विद्यालय, आत्म विकास आधारभूत विद्यालय र श्री बुढानीलकण्ठ उच्च माध्यमिक विद्यालय रहेका छन्।
मन्त्रालयका अनुसार सामुदायिक विद्यालयको वास्तविक अवस्था पहिचान गरी देखिएका समस्या समाधान, आवश्यक सुधार तथा प्रभावकारी समन्वयका लागि विद्यालय अवलोकन अभियानलाई देशभर निरन्तरता दिइनेछ।
