काठमाडौं। १६ मंसिरमा हुने स्थानीय तहको उपनिर्वाचनका लागि उम्मेदवारको मनोनयन दर्ता जारी छ।
निर्वाचन आयोगले आज विहान १० बजेदेखि उम्मेदवारको मनोनयन दर्ता सुरु भएको जनाएको छ। उम्मेदवारी दर्ताको समय साँझ ५ बजेसम्म तोकिएको आयोगकी सहसचिव एवं प्रवक्ता निता पोखरेल अर्यालले जानकारी दिइन्।
आज उम्मेदवारी दर्ता भएपछि (भोलि) ३ मंसिरमा उम्मेदवारको विरोधमा उजुरी दिने सकिनेछ भने ४ मंसिर बेलुकासम्म उजुरी उपर जाँचबुझ गरी आयोगले निर्णय दिनेछ। त्यस्तै ५ मंसिरको दिन उम्मेदवारी फिर्ता लिन चाहने उम्मेदवारले दिउँसो १ बजेसम्म आफ्नो उम्मेदवारी फिर्ता लिन सक्नेछन्।
आयोगका अनुसार त्यसै दिन उम्मेदवारको अन्तिम नामावली प्रकाशन हुनेछ भने उम्मेदवारलाई निर्वाचन चिह्न पनि त्यसै दिन दिइनेछ। १६ गते बिहान ७ देखि ५ बजेसम्म मतदान हुने आयोगले जनाएको छ।
४४ पदका लागि हुन लागेको उपनिर्वाचनका लागि ३८ स्थानमा निर्वाचन अधिकृतको कार्यालय स्थापना भइसकेको छ। २ जिल्ला समन्वय समिति प्रमुख, एक/एक नगर प्रमुख र उपप्रमुख, गाउँपालिका अध्यक्ष २, उपाध्यक्ष ४ र ३४ वडाध्यक्ष पदका लागि निर्वाचन हुनेछ।
