पोखरा। सहकारी ठगी, सङ्गठित अपराध तथा सम्पत्ति शुद्धीकरणको मुद्दामा पक्राउ परेका राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेलाई जिल्ला अदालत कास्कीले थप १० दिन हिरासतमा राख्न प्रहरीलाई अनुमति दिएको छ।
लामिछानेलाई आज मंगलबार कास्की प्रहरीले म्याद थपका लागि जिल्ला अदालतमा उपस्थित गराएको थियो। लामिछाने २ कार्तिकदेखि अनुसन्धानकै क्रममा जिल्ला प्रहरी कार्यालय कास्कीको हिरासतमा छन।
उनलाई जिल्ला अदालत कास्कीले थप १० दिन हिरासतमा राखेर अनुसन्धान गर्न प्रहरीलाई अनुमति दिएको हो। यो थप भएको समय गत १५ गतेदेखि नै जोडिन्छ। जसअनुसार लामिछाने अब २४ कार्तिकसम्म कास्की प्रहरीको हिरासतमा हुनेछन। उनलाई प्रहरीले अब २५ कार्तिकमा अदालतमा उपस्थित गराउनु पर्छ।
पछिल्लोपटक गत ८ कार्तिकमा ७ दिन हिरासतमा राख्न जिल्ला अदालत कास्कीले दिएको म्याद १४ कार्तिकमा नै सकिएपछि आज मंगलबार उनलाई प्रहरीले जिल्ला अदालत कास्की उपस्थित गराएको हो। हिजो १९ कार्तिकसम्म सार्वजनिक बिदा परेकाले उनी १४ गते यता म्याद थप नहुँदा पनि प्रहरी हिरासतमा नै रहे।
जिल्ला प्रहरी कार्यालय कास्कीको हिरासतमा उनलाई प्रहरी र जिल्ला सरकारी वकिल कार्यालयले सहकारी ठगी आरोपमा बयान लिइसकेको छ भने बयानको प्रमाणिकरणसमेत सकिसकेको छ।
कास्की प्रहरीका सूचना अधिकारी डीएसपी वसन्तकुमार शर्माले लामिछानेलाई जिल्ला अदालत कास्कीमा उपस्थित गराइएको जानकारी दिए।
शर्माका अनुसार लामिछानेसँगै सहकारी प्रकरणमा मुछिएका छविलाल जोशीलाई पनि अदालत उपस्थित गराइएको छ।
लामिछानेमाथि सहकारी ठगीसँगै सङ्गठित अपराध र सम्पत्ति शुद्धीकरणको मुद्दामासमेत अनुसन्धान जारी रहेकाले प्रहरीले पुन: म्याद थपका लागि अदालतसँग अनुमति माग्ने तयारी गरेको छ।
लामिछाने गत २ कार्तिकमा काठमाडौँबाट पक्राउ परेका थिए भने उनलाई ३ गते बिहान कास्की ल्याइएको थियो । ४ गते छ दिन र त्यसपछि कार्तिक ८ गते कास्की जिल्ला अदालतले ७ दिन म्याद थप गरेर प्रहरीलाई अनुसन्धान गर्न अनुमति दिएको थियो।
जिल्ला प्रहरी कार्यालय रुपन्देहीले समेत लामिछाने विरुद्ध पक्राउ पुर्जी जारी गरिसकेको छ। कास्की प्रहरीलाई पत्र पठाएकाले उनलाई त्यसतर्फ पठाउने तयारीसमेत भइरहेको प्रहरी स्रोत बताउँछ।
लामिछानेविरुद्ध बुटवलको सुप्रिम बचत तथा ऋण सहकारी संस्थाको बचत रकम हिनामिना गरेको आरोपमा रुपन्देही जिल्ला अदालतले अनुमति दिएसँगै रुपन्देही जिल्ला प्रहरी कार्यालयले पक्राउ पुर्जी जारी गरिसकेको छ।
रुपन्देही प्रहरीले छविलाल जोशीसँग भने यसअघि नै बयान लिइसकेको छ। उनी ६ असोजमा काठमाडौको शंखमुलबाट पक्राउ परेका थिए। उनलाई पनि ८ कात्तिकमा चौथोपटक ७ दिनको म्याद थप भएको थियाे।
