काठमाडौं। राष्ट्रिय स्वतन्त्रपार्टी (रास्वपा)ले मंगलबार प्रधानमन्त्रीको सरकारी निवास अगाडी गरेको प्रदर्शनका क्रममा पक्राउ परेका ५१ जना प्रदर्शनकारीलाई प्रहरीले छाडेको छ।
रास्वपाले स रवि लामिछानेको रिहाइको माग गर्दै आज मंगलबार वालुवाटार केन्द्रित प्रदर्शन गरेको थियो। प्रदर्शनमा पार्टीका केन्द्रीय नेताहरुसमेत सहभागी थिए। सो क्रममा प्रदर्शनकारीले निषेधित क्षेत्र तोड्न खोजेपछि प्रहरीले प्रदर्शनकारीलाई नियन्त्रणमा लिएको थियो।
पक्राउ पर्नेमा १ महिला र ५० जना पुरुष रहेको जिल्ला प्रहरी परिसर काठमाडौंका एसपी नवराज अधिकारीले जानकारी दिए। उनीहरु सबैलाई छाडिएको उनले जानकारी दिए।
रास्वपाले आफ्ना सभापतिलाई राजनीतिक प्रतिशोधका लागि हिरासतमा राखिएको, अनुसन्धानका नाममा थुन्ने र मानसिक दबाब दिने षड्यन्त्र गरिएको भन्दै वार्ता र संघर्ष सँगसँगै अघि बढाउने निर्णय गरेको थियो।
सहकारी ठगी प्रकरणको अनुसन्धानका नाममा पक्राउ गरिएका आफ्ना सभापति रबि लामिछानेलाई राजनीतिक प्रतिशोध त्यागी तत्काल रिहाइ गर्न सरकारसँग माग गर्दै आइरहेको छ।
रास्वपाले केन्द्रीय समिति बैठकमार्फत राजनीतिक प्रतिशोध, भ्रष्टाचार र बेथिति विरुद्ध एवम सहकारी पीडितको ८८ अर्ब फिर्तासहित न्यायका लागि आन्दोलन जारी राख्ने निर्णय गरेको छ।
लमिछानेलाई प्रहरीले गत २ कार्तिकमा काठमाडौबाट पक्राउ गरेर पोखरा पुर्याएको थियो। उनलाई कार्तिक ४ गते पहिलोपटक जिल्ला अदालत कास्कीले ६ दिन हिरासतमा राखेर अनुसन्धान गर्न भन्दै प्रहरीलाई अनुमति दिएको थियो।
सो म्याद सकिएपछि पुन: प्रहरीले म्याद थपका लागि अदालतसँग अनुमति मागेकोमा जिल्ला अदालत कास्कीले दोस्रोपटक ७ दिन हिरासतमा राख्नका लागि अनुमति दिएको थियो।
पछिल्लोपटक थप गरिएको म्यादसमेत १४ कार्तिकमा सकिंदैछ। तर कार्तिक १५ देखि नै तिहार बिदा हुने भएकाले उनलाई कार्तिक २० गते मात्रै अदालत उपस्थित गराइने सम्भावना छ।
