काठमाडौं। नेपाल पञ्चाङ्ग निर्णायक विकास समितिले यस वर्षको भाइटीकाको साइत सार्वजनिक गरेको छ ।
समितिका अनुसार कात्तिक १८ गते आइतबार बिहान ११ बजेर ३७ मिनेटमा भाइटीकाको साइत शुभ रहेको छ।
समितिको आज सोमबार बसेको बैठकले भाइटीकाको शुभ साइत तय गरेको कार्यकारी निर्देशक सूर्यप्रसाद ढुङ्गेलले जानकारी दिए।
समितिले पश्चिम मोहडा गरेर भाइटीका लगाउनु उत्तम हुने भनेको छ।
यसवर्षको यमपञ्चक अर्थात तिहार कार्तिक १३ गते मंगलबार (भोलि) बाट सुरुहुँदै छ। मंगलबार धनतेरस पर्व मनाइन्छ।
यस्तै कार्तिक १४ गते बुधबार कागतिहार र यमदीपदान परेको समितिले जनाएको छ।
यसैगरी आयुर्वेदका प्रवर्तक धन्वन्तरीजयन्ती पनि बुधबार नै मनाइन्छ ।
कुकुर तिहार, नरक चतुर्दशी, दीपमालिका र लक्ष्मीपूजा कात्तिक १५ गते बिहीबार परेको छ भने १६ गते शुक्रबार औंसी परेको समितिले जनाएको छ।
यस्तै कार्तिक १७ गते शनिबार गाई/गोरु पूजा, गोवर्द्धन पूजा, बलि पूजा, हलीतिहार, म्हपूजा परेको छ भने त्यही दिनबाट नेपाल संवत् ११४५ प्रारम्भ हुनेछ।
भाइटीका भने १८ गते आइतबार परेको समितिले जनाएको हो।
